ବାରାଣସୀ : ଜ୍ଞାନବାପି ମସ୍ଜିଦ୍ର ବେସମେଣ୍ଟରେ ପୂଜା ଆରମ୍ଭ କରିବାକୁ ବାରାଣସୀ କୋର୍ଟଙ୍କ ଆଦେଶ ବିରୋଧରେ ମୁସ୍ଲିମ୍ ପକ୍ଷର ଆବେଦନ ଉପରେ ଶୁକ୍ରବାର ଆହ୍ଲାବାଦ ହାଇକୋର୍ଟରେ ଶୁଣାଣି ହୋଇଥିଲା। ଏହି ସମୟ ମଧ୍ୟରେ ହାଇକୋର୍ଟ ପୂଜା ଉପରେ ପ୍ରତିବନ୍ଧକ ଲଗାଇବାକୁ ମନା କରିଦେଇଥିଲେ ଏବଂ ପରବର୍ତ୍ତୀ ଶୁଣାଣି ପାଇଁ ଫେବୃଆରୀ ୬କୁ ସ୍ଥିର କରାଯାଇଛି।
ଆଡ୍ଭୋକେଟ ସୟଦ ଫରମାନ ଅହମ୍ମଦ ନାକଭି ମୁସଲମାନ ପକ୍ଷରୁ ଯୁକ୍ତି ଉପସ୍ଥାପନ କରିଥିଲେ।
ବାରାଣସୀ କୋର୍ଟ ଦେଇଥିବା ଆଦେଶ ପରେ ମସ୍ଜିଦ୍ର ବେସମେଣ୍ଟରେ ପୂଜା ଆରମ୍ଭ ହୋଇଛି। ମୁସଲମାନ ଦଳ କୋର୍ଟଙ୍କ ଆଦେଶ ବିରୋଧରେ ବିଳମ୍ବିତ ରାତିରେ ସୁପ୍ରିମକୋର୍ଟରେ ଏକ ପିଟିଶନ ଦାଖଲ କରିଥିଲେ। ଯାହାକୁ ପ୍ରତ୍ୟାଖ୍ୟାନ କରାଯାଇଥିଲା। ହାଇକୋର୍ଟ ଯିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି। ହାଇକୋର୍ଟରେ ମୁସଲିମ ପକ୍ଷର ଓକିଲ କହିଛନ୍ତି, ‘ଜାନୁଆରୀ ୩୧ରେ ହୋଇଥିବା ଆଦେଶ ଯୋଗୁ ମୋତେ ତୁରନ୍ତ କୋର୍ଟକୁ ଆସିବାକୁ ପଡ଼ିଲା। ଜାନୁଆରୀ ୧୭ର ଆଦେଶକୁ ମଧ୍ୟ ଚ୍ୟାଲେଞ୍ଜ କରିବ ଜଷ୍ଟିସ୍ ରୋହିତ ରଞ୍ଜନ ଏହି ମାମଲାର ଶୁଣାଣି କରିଛନ୍ତି। ଏହି ସ୍ଥାନ ସଂରକ୍ଷଣ କରିବାକୁ ଜଜ୍ ୟୁପି ସରକାରଙ୍କୁ କହିଛନ୍ତି। ହିନ୍ଦୁ ଦଳର ଓକିଲ ବିଷ୍ଣୁଶଙ୍କର ଜୈନ ମୁସଲମାନ ଦଳର ଦାବିକୁ ବିରୋଧ କରିଥିଲେ।