ଯଶୋବନ୍ତ ପରିଡା/_ କପ୍ତିପଦା ଉପଖଣ୍ଡ, ୨୯/୦୮/୨୬/_ (ସମୀକ୍ଷା ନ୍ୟୁଜ):
ମୟୁରଭଞ୍ଜ ଜିଲ୍ଲା ଖୁଣ୍ଟା ଥାନା ଅନ୍ତର୍ଗତ ଶିଳଘାଟି ଜଙ୍ଗଲ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଭଉଣୀ ଓ ଭଣଜାଙ୍କୁ ଶଶୁରଘରକୁ ଛାଡ଼ିବାକୁ ଯାଉଥିବା ସମୟରେ ପଛପଟୁ ଏକ ଦ୍ରୁତଗାମୀ ବୁଲେଟ୍ ଧକ୍କା ଦେବାରୁ ଭାଇଙ୍କର ମୃତ୍ୟୁ ହୋଇଛି ଏବଂ ଭଉଣୀ ଓ ଭଣଜାଙ୍କ ସମେତ ୪ ଜଣ ଗୁରୁତର ଆହତ ହୋଇଛନ୍ତି।
ମିଳିଥିବା ସୂଚନା ଅନୁଯାୟୀ, ଖୁଣ୍ଟା ଥାନା ଅଧୀନ ଶିଆଳିଆ (ଖ) ଗ୍ରାମର ଚାନ୍ଦୁ ହାଁସଦାଙ୍କ ପୁଅ ରଘୁ (୩୦) ଗତ ଶୁକ୍ରବାର ଅପରାହ୍ନରେ ତାଙ୍କ ଭଉଣୀ ସୁହାଗୀ ଏବଂ ୪ ବର୍ଷର ଭଣଜା ଟୁନୁଙ୍କୁ ଏକ ବାଇକ୍ (ହିରୋହୁଣ୍ଡା) ଯୋଗେ ବାଲିଗଡ଼ିଆ ଗ୍ରାମସ୍ଥିତ ଶଶୁରଘରକୁ ଛାଡ଼ିବାକୁ ଯାଉଥିଲେ। ସେହି ସମୟରେ ପି.କେ. ଜୟପୁର ରାସ୍ତାର ଶିଳଘାଟି ଜଙ୍ଗଲ ନିକଟରେ ପଛପଟୁ ଏକ ଦ୍ରୁତଗାମୀ ବୁଲେଟ୍ ସେମାନଙ୍କ ବାଇକକୁ ସାମନା ପଟୁ ବା ପଛରୁ ଜୋର୍ରେ ଧକ୍କା ଦେଇଥିଲା।
ଏହି ଦୁର୍ଘଟଣାରେ ବୁଲେଟ୍ ଆରୋହୀ କୁଆମରା ଫାଣ୍ଡି ଅଧୀନ ପଟୁଆ ଗ୍ରାମର କାଞ୍ଚନ ସରେନ (୨୫), ତାଙ୍କ ସହଯାତ୍ରୀ ସୁଦାମ ମାରାଣ୍ଡି (୨୮) ଏବଂ ବାଇକ୍ରେ ଥିବା ରଘୁ, ସୁହାଗୀ ଓ ଟୁନୁ ଗୁରୁତର ଭାବେ ଆହତ ହୋଇ ରକ୍ତଜୁଡ଼ୁବୁଡ଼ୁ ଅବସ୍ଥାରେ ରାସ୍ତା ଉପରେ ପଡ଼ିରହିଥିଲେ।
ସ୍ଥାନୀୟ ପଥଚାରୀମାନେ ଘଟଣା ସମ୍ପର୍କରେ ଖୁଣ୍ଟା ପୋଲିସ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବର ପାଇ ଉଭୟ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସମସ୍ତ ୫ ଜଣଙ୍କୁ ଉଦ୍ଧାର କରି ଖୁଣ୍ଟା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ। ସେଠାରେ ଡାକ୍ତର ରଘୁଙ୍କୁ ମୃତ ବୋଲି ଘୋଷଣା କରିଥିଲେ। ଅନ୍ୟପକ୍ଷରେ, ଗୁରୁତର ଥିବା ନାବାଳକ ଟୁନି, ସୁହାଗୀ, କାଞ୍ଚନ ଏବଂ ସୁଦାମଙ୍କୁ ପ୍ରାଥମିକ ଚିକିତ୍ସା କରାଯିବା ପରେ ଅଧିକ ଚିକିତ୍ସା ନିମନ୍ତେ ବାରିପଦାସ୍ଥିତ ପି.ଆର୍.ଏମ୍. ମେଡିକାଲ କଲେଜକୁ ସ୍ଥାନାନ୍ତରିତ କରାଯାଇଛି। ଏହି ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
