ପ୍ରଭାତ କୁମାର ପାଇକରାୟ /ସ୍ୱତନ୍ତ୍ର ପ୍ରତିନିଧି / ଖୋରଧା/ ସମୀକ୍ଷା ନ୍ୟୁଜ:
ଖୋରଧା, ୫/୧୦: ଦୀର୍ଘ ୩୦ ବର୍ଷରୁ ଊର୍ଦ୍ଧ୍ୱ ସମୟ ଧରି ଗୋଟିଏ ସ୍ଥାନରେ ଘର କରି ପରିବାର ସହ ରହି ଆସୁଛନ୍ତି। ପିଢ଼ି ପରେ ପିଢ଼ି ଏଠାରେ ଜୀବନ କାଟୁଛନ୍ତି। ହେଲେ ଏତେ ବର୍ଷ ପରେ ବି ନିଜ ବାସସ୍ଥାନର ଆଇନଗତ ଅଧିକାର ମିଳିନାହିଁ। ଏବେ ଉଚ୍ଛେଦ ଆଶଙ୍କା ସହ ଧମକଚମକର ଅଭିଯୋଗ ମଧ୍ୟ ସେମାନଙ୍କ ଚିନ୍ତାକୁ ଆହୁରି ବଢ଼ାଇଦେଇଛି। ନିଜ ବାସସ୍ଥାନକୁ ସୁରକ୍ଷିତ କରିବା ସହ ଆଇନ ଅନୁଯାୟୀ ଜମିର ଅଧିକାର ପାଇଁ ଏବେ ଖୋରଧା ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି ଜେମାଦେଇ ମୌଜା ବଧା ଶବର ସାହିର ଭୂମିହୀନ ପରିବାରଗୁଡ଼ିକ।
ଦରଖାସ୍ତକାରୀମାନଙ୍କ ଅଭିଯୋଗ ଅନୁସାରେ, ଖୋରଧା ପୌରାଞ୍ଚଳ ଅଧୀନ ଜେମାଦେଇ ମୌଜାର ବଧା ଶବର ସାହିର ଖାତା ନଂ-୨୮୯ ଓ ପ୍ଲଟ୍ ନଂ-୮୨୭ରେ ଥିବା ସରକାରୀ ବୃତ୍ତି ଜମିରେ ସେମାନେ ଦୀର୍ଘ ୩୦ ବର୍ଷରୁ ଊର୍ଦ୍ଧ୍ୱ ହେବ କଚ୍ଚାଘର ନିର୍ମାଣ କରି ସ୍ଥାୟୀ ଭାବେ ବସବାସ କରୁଛନ୍ତି। ଏହି ସମୟ ମଧ୍ୟରେ ସେମାନଙ୍କ ପରିବାର ବଢ଼ିଛି, ପିଲାମାନେ ବଡ଼ ହୋଇଛନ୍ତି ଏବଂ ଏହି ବସତି ସେମାନଙ୍କ ଜୀବନର ଏକ ଅବିଚ୍ଛିନ୍ନ ଅଂଶ ପାଲଟିଛି।
ଦରଖାସ୍ତରେ ସେମାନେ ନିଜକୁ ଭୂମିହୀନ ପ୍ରଜା ବୋଲି ଦର୍ଶାଇଛନ୍ତି। ନିଜସ୍ୱ ଜମି କିମ୍ବା ବାସଗୃହ ନଥିବାରୁ ବାଧ୍ୟ ହୋଇ ଉକ୍ତ ସରକାରୀ ବୃତ୍ତି ଜମିରେ ଆଶ୍ରୟ ନେଇଥିବା ସେମାନେ ଦାବି କରିଛନ୍ତି। ଦୀର୍ଘ ବର୍ଷ ଧରି ସେଠାରେ ବସବାସ କରୁଥିଲେ ମଧ୍ୟ ଜମି ସମ୍ପର୍କିତ କୌଣସି ସ୍ଥାୟୀ ଅଧିକାର ନଥିବାରୁ ଭବିଷ୍ୟତକୁ ନେଇ ସେମାନେ ଚିନ୍ତିତ ଥିବା ଜଣାଇଛନ୍ତି।
ଅନ୍ୟପକ୍ଷରେ, କେତେକ ବ୍ୟକ୍ତି ସେମାନଙ୍କ ବସତିକୁ ସହ୍ୟ କରିପାରୁନଥିବା ଏବଂ ଉକ୍ତ ସ୍ଥାନରୁ ଘରଗୁଡ଼ିକୁ ଭାଙ୍ଗି ଉଚ୍ଛେଦ କରିବା ସହ ଜମିକୁ ନିଜ ଅଧୀନକୁ ନେବା ପାଇଁ ଉଦ୍ୟମ କରୁଥିବା ଦରଖାସ୍ତରେ ଅଭିଯୋଗ କରାଯାଇଛି। ଏନେଇ ବିଭିନ୍ନ ସମୟରେ ସେମାନଙ୍କୁ ଧମକଚମକ ଦିଆଯାଉଥିବା ମଧ୍ୟ ଅଭିଯୋଗ ହୋଇଛି। ଏହା ଫଳରେ ମହିଳା, ଶିଶୁ ଓ ବୟସ୍କଙ୍କ ସମେତ ସମସ୍ତ ପରିବାର ଭୟଭୀତ ଅବସ୍ଥାରେ ରହୁଥିବା ସେମାନେ କହିଛନ୍ତି।
ଏତେ ବର୍ଷ ଧରି ଯେଉଁ ଘରକୁ ନିଜର ଆଶ୍ରୟସ୍ଥଳ ଭାବେ ଗଢ଼ି ତୋଳିଛନ୍ତି, ତାହା ଯଦି ହଠାତ୍ ଭାଙ୍ଗି ଦିଆଯାଏ, ତେବେ ପରିବାର ସହ କେଉଁଠି ରହିବେ ଏବଂ କେଉଁଠି ଆଶ୍ରୟ ନେବେ, ତାହାକୁ ନେଇ ସେମାନେ ଚିନ୍ତିତ ଅଛନ୍ତି। ତେଣୁ ଘଟଣାର ତୁରନ୍ତ ଅନୁଧ୍ୟାନ କରାଯାଇ ସେମାନଙ୍କ ବସତିର ସ୍ଥିତି, ଜମିର ପ୍ରକୃତି ଓ ସେମାନଙ୍କ ଦୀର୍ଘଦିନର ଦଖଲ ସମ୍ପର୍କରେ ରାଜସ୍ୱସ୍ତରରେ ତଦନ୍ତ କରାଯିବାକୁ ସେମାନେ ଦାବି କରିଛନ୍ତି।
ଦରଖାସ୍ତକାରୀମାନଙ୍କ ମୁଖ୍ୟ ଦାବି ହେଉଛି, ସେମାନଙ୍କ ସମସ୍ୟାକୁ ମାନବିକ ଦୃଷ୍ଟିକୋଣ ସହ ଆଇନଗତ ଭାବେ ବିଚାର କରାଯାଉ। ଦୀର୍ଘ ବର୍ଷ ଧରି ସେମାନେ ବସବାସ କରୁଥିବା ଜମିରେ ସ୍ଥାୟୀ ବାସଗୃହ ନିର୍ମାଣ କରି ବସବାସ କରିବା ପାଇଁ ଆବଶ୍ୟକ ଅନୁମତି ଦିଆଯାଉ। ଏଥିସହ ଦଖଲ ଓ ପ୍ରଚଳିତ ଆଇନ ଅନୁଯାୟୀ ଜମି ସମ୍ପର୍କରେ ଆବଶ୍ୟକ ଯାଞ୍ଚ କରି ଯୋଗ୍ୟ ଦରଖାସ୍ତକାରୀଙ୍କ ନାମରେ ରେକର୍ଡଭୁକ୍ତ କରିବା ଦିଗରେ ପଦକ୍ଷେପ ନିଆଯାଉ ବୋଲି ସେମାନେ ନିବେଦନ କରିଛନ୍ତି।
ସେମାନେ ଆହୁରି ଦାବି କରିଛନ୍ତି ଯେ, ପ୍ରଶାସନିକ ତଦନ୍ତ ଶେଷ ନହେବା ପର୍ଯ୍ୟନ୍ତ କୌଣସି ବେଆଇନ ଉଚ୍ଛେଦ କିମ୍ବା ଘର ଭାଙ୍ଗିବା ଭଳି ପଦକ୍ଷେପ ନିଆନଯାଉ। ଏଥିସହ ଧମକଚମକ ଦେଉଥିବା ଅଭିଯୋଗର ମଧ୍ୟ ଆବଶ୍ୟକ ଯାଞ୍ଚ କରାଯାଇ ସେମାନଙ୍କ ସୁରକ୍ଷା ନିଶ୍ଚିତ କରାଯାଉ ବୋଲି ସେମାନେ ଅନୁରୋଧ କରିଛନ୍ତି।
ବର୍ଷ ବର୍ଷ ଧରି ଏକ ସ୍ଥାନରେ ବସତି ସ୍ଥାପନ କରି ଜୀବନ କାଟୁଥିବା ଏହି ଭୂମିହୀନ ପରିବାରଗୁଡ଼ିକ ଏବେ ନିଜ ମୁଣ୍ଡ ଗୁଞ୍ଜିବା ପାଇଁ ଏକ ସ୍ଥାୟୀ ଠିକଣା ଓ ଆଇନଗତ ସୁରକ୍ଷା ଆଶା କରୁଛନ୍ତି। ତେଣୁ ଜିଲ୍ଲାପାଳ ଏହି ମାମଲାରେ ହସ୍ତକ୍ଷେପ କରି ରାଜସ୍ୱ ଅଧିକାରୀଙ୍କ ମାଧ୍ୟମରେ ତଦନ୍ତ କରାଇ ଯୋଗ୍ୟତା ଅନୁଯାୟୀ ଆଇନସମ୍ମତ ପଦକ୍ଷେପ ନେବେ ବୋଲି ଦରଖାସ୍ତକାରୀମାନେ ଆଶା ପ୍ରକାଶ କରିଛନ୍ତି।
