ଯଶୋବନ୍ତ ପରିଡା/କପ୍ତିପଦା ଉପଖଣ୍ଡ/ ୩୦/୦୬/୨୬ (ସମୀକ୍ଷା ନିୟୁଜ):
ମୟୂରଭଞ୍ଜ ଜିଲ୍ଲା କପ୍ତିପଦା ଉପଖଣ୍ଡର ପ୍ରସିଦ୍ଧ ଶକ୍ତିପୀଠ ‘ଦେବକୁଣ୍ଡ’। ଶିମିଳିପାଳ ଟାଇଗର ରିଜର୍ଭର ନିବିଡ଼ ଅରଣ୍ୟ ଭିତରେ ମା’ ଅମ୍ବିକାଙ୍କ ପୀଠ। ଏହି ସ୍ଥାନର ପ୍ରାକୃତିକ ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଆକୃଷ୍ଟ କରୁଥିଲେ ମଧ୍ୟ, ଅବହେଳାର ଶିକାର ହୋଇଛି ଏହି ପୀଠ।
ଏହି ପୀଠର ଉନ୍ନତିକରଣ ଏବଂ ଏହାକୁ ଏକ ପୂର୍ଣ୍ଣାଙ୍ଗ ପର୍ଯ୍ୟଟନ ସ୍ଥଳୀର ମାନ୍ୟତା ଦେବା ଦାବିରେ ଏବେ ରାଜରାସ୍ତାକୁ ଓହ୍ଲାଇଛି ‘କଳିଙ୍ଗ ମୋର୍ଚ୍ଚା’।
ପର୍ଯ୍ୟଟନ ଋତୁରେ ଓଡ଼ିଶା ସମେତ ପଡ଼ୋଶୀ ରାଜ୍ୟ ଝାଡ଼ଖଣ୍ଡ, ବିହାର ଓ ପଶ୍ଚିମବଙ୍ଗରୁ ହଜାର ହଜାର ଭକ୍ତ ଓ ପର୍ଯ୍ୟଟକ ଏଠାକୁ ଆସିଥାନ୍ତି। ମା’ ଅମ୍ବିକାଙ୍କ ଦର୍ଶନ ସହ ଶିମିଳିପାଳର କୁଳୁକୁଳୁ ଝରଣା ଓ ସବୁଜିମା ଭରା ପ୍ରାକୃତିକ ଦୃଶ୍ୟକୁ ଉପଭୋଗ କରନ୍ତି। ମାତ୍ର ଦୁର୍ଭାଗ୍ୟର ବିଷୟ, ଶିମିଳିପାଳ ମୁଖ୍ୟ ଫାଟକଠାରୁ ମନ୍ଦିର ପର୍ଯ୍ୟନ୍ତ ରହିଥିବା ୫ କିଲୋମିଟର ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ।
କଳିଙ୍ଗ ମୋର୍ଚ୍ଚାର କହିବା କଥା, ଯଦି ଏହି ପୀଠର ଭିତ୍ତିଭୂମି ବିକାଶ କରାଯିବ, ତେବେ ଏହା ଏକ ପ୍ରମୁଖ ପର୍ଯ୍ୟଟନ କେନ୍ଦ୍ର ଭାବେ ଗଢ଼ି ଉଠିବ। ଏଥିପାଇଁ ପକ୍କା ରାସ୍ତା, ପାନୀୟ ଜଳ ଓ ଅନ୍ୟାନ୍ୟ ସୁବିଧା ଯୋଗାଇ ଦେବାକୁ ପ୍ରଶାସନ ନିକଟରେ ଦାବି ହୋଇଛି। ଏବେ ଦେଖିବାକୁ ବାକି ରହିଲା, ପ୍ରଶାସନ କେବେ ଏହି ଦାବିକୁ ଗୁରୁତର ସହ ନେଉଛି।
