ପ୍ରଭାତ କୁମାର ପାଇକରାୟ /ସ୍ୱତନ୍ତ୍ର ପ୍ରତିନିଧି / ଖୋରଧା/ ସମୀକ୍ଷା ନ୍ୟୁଜ:
ଖୋରଧା ରୁ ବ୍ରହ୍ମପୁର ପର୍ଯ୍ୟନ୍ତ ବ୍ୟାପିଥିବା ଏକ ଚୋରା ତମାଖୁ ଉତ୍ପାଦନ ଓ ବିତରଣ ନେଟୱର୍କର ପର୍ଦ୍ଦାଫାସ କରିଛି ଖୋରଧା ସଦର ଥାନା ପୁଲିସ। ତାପଙ୍ଗ ଛକ ନିକଟରେ ଏକ ମିନିଟ୍ରକ୍ରୁ ବେଆଇନ ଭାବେ ତମାଖୁଜାତ ଦ୍ରବ୍ୟ ଚାଲାଣ ଅଭିଯୋଗରେ ଧରାପଡ଼ିଥିବା ଘଟଣାର ତଦନ୍ତ କରୁ କରୁ ପୁଲିସ ବ୍ରହ୍ମପୁର ବାଉଁଶପାଲିସ୍ଥିତ ଏକ ପରିସରରେ ପହଞ୍ଚିଥିଲା। ସେଠାରୁ ବିପୁଳ ପରିମାଣର ଗୁଟ୍ଖା ଓ ଅନ୍ୟାନ୍ୟ ତମାଖୁଜାତ ସାମଗ୍ରୀ, କଞ୍ଚାମାଲ, ନଗଦ ଟଙ୍କା ଏବଂ ଯନ୍ତ୍ରପାତି ଜବତ ହୋଇଛି। ଖୋରଧା ଜିଲ୍ଲା ପୁଲିସ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏ ସମ୍ପର୍କରେ ଖୋରଧା ଏସ୍ପି ପରମାର ସ୍ମିତ ପର୍ଶୋତ୍ତମଦାସଙ୍କ ସୂଚନା ଅନୁଯାୟୀ, ଗତକାଲି ଅପରାହ୍ନ ପ୍ରାୟ ୨ଟା ୨୫ ମିନିଟ୍ ସମୟରେ ଖୋରଧା ସଦର ଥାନାର ଏ.ଏସ.ଆଇ ଚନ୍ଦ୍ରମଣି ସାହୁ ଅନ୍ୟ ପୁଲିସ କର୍ମଚାରୀଙ୍କ ସହ ଦିନବେଳା ପାଟ୍ରୋଲିଂ କରୁଥିବା ସମୟରେ ତମାଖୁଜାତ ସାମଗ୍ରୀ ବିନା ଲାଇସେନ୍ସ ରେ ଚାଲାଣ ହେଉଥିବା ସମ୍ପର୍କରେ ସୂଚନା ପାଇଥିଲେ।
ସୂଚନା ଆଧାରରେ ପୁଲିସ ତାପଙ୍ଗ ଛକ ନିକଟରେ ଓଡି-୦୭-ବିଏ-୬୧୧୭ ନମ୍ବର ବିଶିଷ୍ଟ ଏକ ମିନିଟ୍ରକ୍କୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ସମୟରେ ଗାଡ଼ିରେ ୬୦୦ଟି ଧଳା ଜରି ବସ୍ତା ଥିବା ଏବଂ ପ୍ରତ୍ୟେକ ବସ୍ତାରେ ୩୦ଟି ଲେଖାଏଁ ତମାଖୁଜାତ ପ୍ୟାକେଟ୍ ରହିଥିବା ପୁଲିସ ଜାଣିବାକୁ ପାଇଥିଲା । ଗାଡ଼ିର ଚାଳକ ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ଥାନା ଅଞ୍ଚଳର ସନ୍ତୋଷ କୁମାର ରଣା (୨୮)ଙ୍କୁ ପୁଲିସ ଅଟକ ରଖି ପଚରାଉଚରା କରିଥିଲା। ତଦନ୍ତ ସମୟରେ ତାଙ୍କଠାରୁ ମିଳିଥିବା ସୂଚନା ଆଧାରରେ ପୁଲିସ ବ୍ରହ୍ମପୁର ବାଉଁଶପାଲିସ୍ଥିତ ଏକ ସ୍ଥାନରେ ଚଢ଼ଉ କରିଥିଲା।
ସ୍ଥାନୀୟ ପୁଲିସର ସହଯୋଗରେ ହୋଇଥିବା ଏହି ଚଢ଼ଉରେ ଆହୁରି ୨୦୦ଟି ଧଳା ଜରି ବସ୍ତାରୁ ସମାନ ପ୍ରକାରର ତମାଖୁଜାତ ପ୍ୟାକେଟ୍ ଜବତ ହୋଇଥିବା ପୁଲିସ କହିଛି। ଏହା ସହିତ ସେଠାରେ ଥିବା ଏକ ମିନିଟ୍ରକ ଓଡ଼ି-୦୭-ଏଏଚ-୩୦୭୮ ମଧ୍ୟରେ ୨୦୦ଟି ବସ୍ତାରେ ତମାଖୁଜାତ ସାମଗ୍ରୀ ରହିଥିବା ଜଣାପଡ଼ିଥିଲା। ଚଢ଼ଉ ସମୟରେ ପରିସରରୁ ବିଭିନ୍ନ ପ୍ରକାରର ରାସାୟନିକ କଞ୍ଚାମାଲ ସହ ୨ ଲକ୍ଷ ୯୪ ହଜାର ଟଙ୍କା ନଗଦ ଜବତ ହୋଇଥିବା ପୁଲିସ ସୂଚନା ଦେଇଛି। ଘଟଣାସ୍ଥଳରେ ଉପସ୍ଥିତ ଦୁଇଜଣ ବ୍ୟକ୍ତିଙ୍କୁ ବ୍ରହ୍ମପୁର ଅଞ୍ଚଳର ଦୀପକ କୁମାର ସାହୁ (୨୬) ଓ ହରିହର ସାହୁ (୩୯) ବୋଲି ପୁଲିସ ଚିହ୍ନଟ କରିଛି। ଅଭିଯୁକ୍ତମାନଙ୍କ ଭୂମିକା ସମ୍ପର୍କରେ ତଦନ୍ତ ଜାରି ରହିଛି।
ପୁଲିସର ପ୍ରାଥମିକ ଆକଳନ ଅନୁଯାୟୀ, ମୋଟ ୧,୦୦୦ଟି ଜରି ବସ୍ତାରେ ପ୍ରତ୍ୟେକରେ ୩୦ଟି ଲେଖାଏଁ ଗୁଟ୍ଖା ତମାଖୁଜାତ ସାମଗ୍ରୀ ରହିଥିଲା। ଜବତ ତମାଖୁଜାତ ସାମଗ୍ରୀର ଆନୁମାନିକ ମୂଲ୍ୟ ପ୍ରାୟ ୪୫ ଲକ୍ଷ ଟଙ୍କା ବୋଲି ପୁଲିସ ଆକଳନ କରିଛି। ଏହା ବ୍ୟତୀତ ପ୍ରାୟ ୫୦ ହଜାର ଟଙ୍କା ମୂଲ୍ୟର କଞ୍ଚାମାଲ, ପ୍ରାୟ ୩୦ ହଜାର ଟଙ୍କା ମୂଲ୍ୟର ୩ଟି ସିଲେଇ ମେସିନ୍ ଏବଂ ଦୁଇଟି ମିନିଟ୍ରକ୍ ଜବତ କରାଯାଇଛି।
ଚଢ଼ଉରେ କେବଳ ଗୁଟ୍ଖା ଜବତ ହୋଇନାହିଁ; କଞ୍ଚାମାଲ ଓ ଯନ୍ତ୍ରପାତି ମିଳିବା ଘଟଣା ତଦନ୍ତକୁ ନୂଆ ଦିଗ ଦେଇଛି। ଉକ୍ତ ସ୍ଥାନରେ କେବଳ ତମାଖୁଜାତ ସାମଗ୍ରୀ ଗଚ୍ଛିତ ରଖାଯାଉଥିଲା ନା ଏଠାରେ ଏହାର ପ୍ରକ୍ରିୟାକରଣ, ପ୍ୟାକେଜିଂ କିମ୍ବା ଉତ୍ପାଦନ ସମ୍ପର୍କିତ କାର୍ଯ୍ୟ ମଧ୍ୟ ଚାଲୁଥିଲା, ସେନେଇ ପୁଲିସ ତଦନ୍ତ କରୁଛି।
ତଦନ୍ତକାରୀ ଅଧିକାରୀମାନେ ଏବେ ଏହି କାରବାରର ଯୋଗାଣ ଉପରେ ନଜର ଦେଇଛନ୍ତି। ଜବତ କଞ୍ଚାମାଲ କେଉଁଠାରୁ ଆସୁଥିଲା, ତମାଖୁଜାତ ସାମଗ୍ରୀ କିଏ ଯୋଗାଉଥିଲା, ପ୍ୟାକେଜିଂ ଓ ପରିବହନ କିପରି ହେଉଥିଲା ଏବଂ ଏହି ସାମଗ୍ରୀ କେଉଁ ଅଞ୍ଚଳକୁ ପଠାଯିବାର ଯୋଜନା ଥିଲା, ସେ ସମ୍ପର୍କରେ ତଦନ୍ତ ଚାଲିଛି। ଜବତ ହୋଇଥିବା ଦୁଇଟି ମିନିଟ୍ରକ୍ର ମାଲିକାନା, ବ୍ୟବହାର ଓ ପୂର୍ବରୁ ଏହି ଗାଡ଼ିଗୁଡ଼ିକ ମାଧ୍ୟମରେ ସମାନ ପ୍ରକାରର ଚାଲାଣ ହୋଇଥିଲା କି ନାହିଁ, ତାହା ମଧ୍ୟ ପୁଲିସ ଯାଞ୍ଚ କରୁଛି। ଏଥିସହ ଘଟଣାସ୍ଥଳରୁ ଜବତ ୨.୯୪ ଲକ୍ଷ ଟଙ୍କାର ଉତ୍ସ ଓ ଏହାର କାରବାର ସହ ସମ୍ପର୍କ ନେଇ ମଧ୍ୟ ତଦନ୍ତ କରାଯାଉଛି। ସଦର ଥାନା କେଶ ନମ୍ବର ୪୬୩/୨୬, ଭାରତୀୟ ନ୍ୟାୟ ସଂହିତା ଧାରା ୩୦୩ (୨) ୨୭୪ ଓ ୨୭୫ ସହ ସିଗାରେଟ ଆଣ୍ଡ ଅଦର ଟବାକୋ ପ୍ରଡକ୍ଟସ୍ ଆକ୍ଟ (କୋଟପା) ର ଧାରା ୭ ଅନୁଯାୟୀ ମାମଲା ରୁଜ୍ଜୁ ହୋଇଛି। ଖୋରଧା ଏସ୍ପି ଙ୍କ ନିର୍ଦ୍ଦେଶନାରେ ଏବଂ ଏସ.ଡି.ପି.ଓ ପଙ୍କଜ କୁମାର ମାଝୀ ଓ ସଦର ଥାନା ଆଇ.ଆଇ.ସି ବାସୁଦେବ ଜୟସିଂହଙ୍କ ତତ୍ତ୍ୱାବଧାନରେ ଏହି ଚଢ଼ଉ ଓ ତଦନ୍ତ କରାଯାଇଥିବା ପୁଲିସ ପକ୍ଷରୁ କୁହାଯାଇଛି।
