ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ଜନ୍ମସ୍ଥଳୀ ଗୁରୁଜାଙ୍ଗକୁ ହେରିଟେଜ୍ ଗ୍ରାମର ମାନ୍ୟତା ଘୋଷଣା କଲେ ମୁଖ୍ୟମନ୍ତ୍ରୀ

ପୁଲକେଶ୍ୱର ମିଶ୍ର/ ସ୍ୱତନ୍ତ୍ର ପ୍ରତିନିଧି/ସମୀକ୍ଷା ନ୍ୟୁଜ୍, ତାଳଚେର: ​ତାଳଚେର: ବିଶିଷ୍ଟ ସନ୍ଥ ତଥା ସମାଜସଂସ୍କାରକ ‘ବେଦାନ୍ତ କେଶରୀ’ ପୂଜ୍ୟପାଦ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ଜନ୍ମ ଶତବାର୍ଷିକୀ ଉପଲକ୍ଷେ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ତାଳଚେର ସ୍ଥିତ ତାଙ୍କର ଜନ୍ମସ୍ଥଳୀ ଗୁରୁଜାଙ୍ଗ ଗ୍ରାମ ପରିଦର୍ଶନ କରିଛନ୍ତି। ଏହି ପବିତ୍ର ଅବସରରେ ମୁଖ୍ୟମନ୍ତ୍ରୀ ସ୍ୱାମୀଜୀଙ୍କ ସ୍ମୃତିକୁ ଚିରସ୍ମରଣୀୟ କରିବା ପାଇଁ ଗୁରୁଜାଙ୍ଗକୁ ଏକ “ଐତିହ୍ୟ ଗ୍ରାମ” (Heritage Village) ଏବଂ ଗୁରୁଜାଙ୍ଗ ପଞ୍ଚାୟତକୁ “ଆଦର୍ଶ ପଞ୍ଚାୟତ” ଭାବରେ ବିକଶିତ କରିବା ପାଇଁ ଏକ ବଡ଼ ଘୋଷଣା କରିଛନ୍ତି।
​ତାଳଚେରରୁ କନ୍ଧମାଳ ଯାତ୍ରା ଓ ସେବା କାର୍ଯ୍ୟ
୧୯୨୪ ମସିହାରେ ତାଳଚେରର ଗୁରୁଜାଙ୍ଗ ଗ୍ରାମରେ ଜନ୍ମଗ୍ରହଣ କରିଥିବା ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀ ପରବର୍ତ୍ତୀ ସମୟରେ ଆଧ୍ୟାତ୍ମିକ ଅନ୍ୱେଷଣ ପାଇଁ ହିମାଳୟ ଯାତ୍ରା କରି କଠୋର ତପସ୍ୟା କରିଥିଲେ। ୧୯୬୫-୬୬ ମସିହାରେ ସେ ଗୋ-ରକ୍ଷା ଆନ୍ଦୋଳନ ସହିତ ଜଡ଼ିତ ହେବା ପରେ କନ୍ଧମାଳ (ଫୁଲବାଣୀ)ର ଅତି ଦୁର୍ଗମ ବନବାସୀ ଅଞ୍ଚଳକୁ ନିଜର କର୍ମଭୂମି ଭାବେ ବାଛିନେଇଥିଲେ। ସେଠାରେ ସେ:
​ଚକାପାଦରେ ଆଶ୍ରମ, ଗୁରୁକୁଳ ସଂସ୍କୃତ ବିଦ୍ୟାଳୟ ଓ କଲେଜ ପ୍ରତିଷ୍ଠା କରିଥିଲେ।
​ଜଳେଶପଟ୍ଟାରେ ଶଙ୍କରାଚାର୍ଯ୍ୟ କନ୍ୟାଶ୍ରମ ସ୍ଥାପନ କରି ଶହ ଶହ ବନବାସୀ ଝିଅମାନଙ୍କୁ ମାଗଣା ଶିକ୍ଷା ଓ ସଂସ୍କାର ପ୍ରଦାନ କରିଥିଲେ।
​ଅବହେଳିତ ଅଞ୍ଚଳରେ ଚିକିତ୍ସାଳୟ, ସାମାଜିକ ସଚେତନତା, ମଦ୍ୟପାନ ନିବାରଣ ଏବଂ ଆଦର୍ଶ ଚାଷ ପ୍ରଣାଳୀ ଶିକ୍ଷା ଦେଇ ଲୋକଙ୍କୁ ଆତ୍ମନିର୍ଭରଶୀଳ କରିଥିଲେ।
​ଜ୍ଞାନ ଓ ସଂସ୍କୃତିର ପ୍ରଚାର
ସଂସ୍କୃତ ବ୍ୟାକରଣ ତଥା ବେଦାନ୍ତ ଦର୍ଶନରେ ଅଗାଧ ପାଣ୍ଡିତ୍ୟ ଥିବାରୁ ତାଙ୍କୁ ‘ବେଦାନ୍ତ କେଶରୀ’ ଉପାଧିରେ ଭୂଷିତ କରାଯାଇଥିଲା। ଗୀତା ଓ ବୈଦିକ ଜ୍ଞାନର ଆଲୋକକୁ ସମାଜର ପ୍ରତ୍ୟେକ ବର୍ଗରେ ପହଞ୍ଚାଇବା ପାଇଁ ସେ ଗ୍ରାମେ ଗ୍ରାମେ ଭାଗବତ ଘର ସ୍ଥାପନ ସହିତ ବିଭିନ୍ନ ଧର୍ମଗ୍ରନ୍ଥର ପ୍ରଚାର ପ୍ରସାର କରିଥିଲେ। ସମାଜସେବା ଓ ଜନଜାତିଙ୍କ ଅଧିକାର ରକ୍ଷା ପାଇଁ ଆଜୀବନ ସଂଘର୍ଷ କରିଥିବା ଏହି ମହାନ ସନ୍ଥଙ୍କ ସ୍ମୃତିକୁ ଉଜ୍ଜୀବିତ ରଖିବା ପାଇଁ ସରକାରଙ୍କ ଏହି ପଦକ୍ଷେପକୁ ସ୍ଥାନୀୟ ଅଞ୍ଚଳବାସୀ ସ୍ୱାଗତ ଜଣାଇଛନ୍ତି।