ଭବାନୀ ଶଙ୍କର ମିଶ୍ର/ବରିଷ୍ଠ ସାମ୍ବାଦିକ /ମୟୂରଭଞ୍ଜ /ସମୀକ୍ଷା ନ୍ୟୁଜ:
ବଡ଼ସାହି, ୧୪/୧୦/୨୬ – ଦୀର୍ଘ ୮ବର୍ଷ ବ୍ୟବଧାନରେ କଲେଜ ନିର୍ବାଚନ ନେଇ ଛାତ୍ରଛାତ୍ରୀ ଉତ୍ସାହିତ ଥିବା ସମୟରେ କେତେକ କଲେଜରେ ବିଶୃଙ୍ଖଳା ଓ ଉତ୍ତେଜନା ଘେନି ଛାତ୍ରଛାତ୍ରୀ ମହଲରେ ଅଶାନ୍ତି ଦେଖାଯାଉଛି । ତେବେ କଲେଜ ନିର୍ବାଚନକୁ ଆଉ ଗୋଟିଏ ଦିନ ବାକି ଥିବାବେଳେ ଶତାଧିକ ଛାତ୍ରଛାତ୍ରୀ ଦୁଇଟି ବସ୍ରେ ପୁରୀ ଅଭିମୁଖେ ଯାଉଥିବା ସମୟରେ ପୋଲିସ ସନ୍ଦେହରେ ବସ୍ ଦୁଇଟିକୁ ଅଟକାଇ ପଚରାଉଚରା କରିବା ପରେ ପ୍ରକୃତ ଘଟଣା ଜଣାପଡ଼ିଛି । ଘଟଣାଟି ମୟୂରଭଞ୍ଜ ଜିଲ୍ଲାର ଚିତ୍ରଡ଼ା ମହାବିଦ୍ୟାଳୟର ଛାତ୍ରଛାତ୍ରୀଙ୍କୁ ନେଇ ଘଟିଛି । ସୂଚନା ଅନୁଯାୟୀ, ଚିତ୍ରଡ଼ା ମହାବିଦ୍ୟାଳୟର ଶତାଧିକ ଛାତ୍ରଛାତ୍ରୀ କେତେକ ଅଭିଭାବକଙ୍କ ସହ ଦୁଇଟି ବସ୍ରେ ପୁରୀ ଯାଇ ଶ୍ରୀଜଗନ୍ନାଥଙ୍କ ଦର୍ଶନ କରିବା ସହ ବୁଲାବୁଲି କରିବାକୁ ବାହାରିଥିଲେ । ତେବେ କଲେଜ ନିର୍ବାଚନର ଠିକ୍ ଗୋଟିଏ ଦିନ ପୂର୍ବରୁ ଏଭଳି ଯାତ୍ରାକୁ ନେଇ ପୋଲିସ ସନ୍ଦେହ ପ୍ରକାଶ କରିଥିଲା । ଫଳରେ ବେତନଟୀ ପୋଲିସ ଉକ୍ତ ଦୁଇଟି ବସ୍କୁ ଅଟକାଇ ଥାନାକୁ ନେବା ସହ ଉପସ୍ଥିତ ଛାତ୍ରଛାତ୍ରୀ ଓ ଅଭିଭାବକଙ୍କୁ ପଚରାଉଚରା କରିଥିଲା । ପଚରାଉଚରା ସମୟରେ ଛାତ୍ରଛାତ୍ରୀ ଓ ଅଭିଭାବକମାନେ ନିଜ ଇଚ୍ଛାରେ ଶ୍ରୀଜଗନ୍ନାଥଙ୍କ ଦର୍ଶନ ଓ ବୁଲାବୁଲି ପାଇଁ ଯାଉଥିବା ପ୍ରକାଶ କରିଥିଲେ । ପରେ ପୋଲିସ ଛାତ୍ରଛାତ୍ରୀ ଓ ଅଭିଭାବକଙ୍କୁ ବୁଝାସୁଝା କରି ଦୁଇଟି ବସ୍ ଯୋଗେ ଚିତ୍ରଡ଼ାକୁ ଫେରାଇ ଆଣିଥିଲା । ଏହାପରେ ଛାତ୍ରଛାତ୍ରୀଙ୍କ ଅଭିଭାବକଙ୍କୁ ଡକାଯାଇ ସେମାନଙ୍କୁ ଘରକୁ ଫେରାଇବାର ବ୍ୟବସ୍ଥା କରାଯାଇଥିବା ଜଣାପଡ଼ିଛି ।
କଲେଜ ନିର୍ବାଚନରେ କୌଣସି ରାଜନୈତିକ ଦଳର ପ୍ରତ୍ୟକ୍ଷ ସମର୍ଥନ ନଥିବା କୁହାଯାଉଥିଲେ ମଧ୍ୟ ପରୋକ୍ଷ ସମର୍ଥନକୁ ନେଇ ଚର୍ଚ୍ଚା ରହିଛି । ଏଭଳି ସ୍ଥିତିରେ ନିର୍ବାଚନର ଠିକ୍ ପୂର୍ବରୁ ଛାତ୍ରଛାତ୍ରୀଙ୍କ ଏହି ଯାତ୍ରାକୁ ନେଇ ବିଭିନ୍ନ ପ୍ରଶ୍ନ ଉଠିଛି । ଏହା କେବଳ ଧାର୍ମିକ ଯାତ୍ରା ଥିଲା ନା ଏହା ପଛରେ ନିର୍ବାଚନ ସମ୍ପର୍କିତ ଅନ୍ୟ କୌଣସି କାରଣ ରହିଛି, ତାହାକୁ ନେଇ ଚର୍ଚ୍ଚା ଜୋର ଧରିଛି । ତେବେ ଏ ସମ୍ପର୍କରେ କୌଣସି ନିର୍ଦ୍ଦିଷ୍ଟ ତଥ୍ୟ ସାମ୍ନାକୁ ଆସିନାହିଁ । ପୋଲିସ ଖବର ଦେବାପରେ ଆମେ ଘଟଣାସ୍ଥଳରେ ପହଞ୍ଚି କଲେଜ ତରଫରୁ ପିଲାମାନେ କେହି ଯାଇନାହାନ୍ତି ବୋଲି କଲେଜ ଅଧ୍ୟକ୍ଷ ବିଶ୍ଵଜିତ ମହାନ୍ତ ପ୍ରକାଶ କରିଥିଲେ । ସେହିପରି ମୋରଡା ଥାନା ଅଧିକାରୀ କହିଛନ୍ତି ଯେ ଦୁଇଟି ବସରେ ଗୋଟିଏ କଲେଜରୁ ୭୫ ପିଲା ଯିବାକୁ ନେଇ ଆମର ସନ୍ଦେହ ହୋଇଥିଲା । ଦୁଇଟି ବସ କୌଣସି ଅନୁମତି ନନେଇ ଯିବାରୁ ବସ୍ କୁ ଅଟକ କରାଯାଇଥିଲା । ପରେ ଅଭିଭାବକଙ୍କ ଜରିଆରେ ପିଲାଙ୍କୁ ନିଜନିଜ ଘରକୁ ଛଡା ଯାଇଥିବା ଜଣାପଡିଛି । ତେବେ ନିର୍ବାଚନରେ ପ୍ରଭାବ ପକେଇବାକୁ ଏହା କୌଣସି ରାଜନୈତିକ ଦଳର ଚାଲ ହୋଇଥାଇପାରେ ବୋଲି ଅଞ୍ଚଳରେ ଜୋର ଚର୍ଚ୍ଚା ହେଉଛି । ଅନ୍ୟ ଘଟଣାରେ ଉଦଳା କଲେଜରେ ବିକ୍ଷୋଭ ପ୍ରଦର୍ଶନ ଓ ବାଇଗଣବାଡ଼ିଆସ୍ଥ ବାବା ବଳିଆ କଲେଜରେ ମଧ୍ୟ ବିଶୃଙ୍ଖଳା ହୋଇଥିବା ଜଣାପଡିଛି ।
