ତଲାବିରା କୋଇଲା ଡମ୍ପ ୟାର୍ଡରେ ଭୟାବହ ଅଗ୍ନିକାଣ୍ଡ : ଘନ ଧୂଆଁରେ ପରିବେଶ ଅସ୍ତବ୍ୟସ୍ତ, କୋଟି କୋଟି ଟଙ୍କାର କୋଇଲା କ୍ଷତି ନେଇ ପ୍ରଶ୍ନ‘ଦାୟିତ୍ୱ କିଏ ନେବ?, କମ୍ପାନୀର ଆଭିମୁଖ୍ୟକୁ ନେଇ ତେଜିଲା ଅସନ୍ତୋଷ

ବିଜୟ ଶଙ୍କର ଦାଶ/ ସ୍ଵତନ୍ତ୍ର ପ୍ରତିନିଧି /ଝାରସୁଗୁଡ଼ା :

ଝାରସୁଗୁଡ଼ା,୪/୯ : ଏନଏଲସି କମ୍ପାନୀ ପରିଚାଳିତ ତଲାବିରା-୨ ଓ ୩ ଓପନ କାଷ୍ଟ ପ୍ରୋଜେକ୍ଟ (ଓସିପି)ର କୋଇଲା ଡମ୍ପ ୟାର୍ଡରେ ନିଆଁ ଲାଗିଥିବା ଦୃଶ୍ୟ ସାମ୍ନାକୁ ଆସିଛି l ଡମ୍ପ ୟାର୍ଡର ବିଭିନ୍ନ ସ୍ଥାନରୁ ଘନ ଧଳା ଧୂଆଁ ବାହାରୁଥିବା ସହ ଅନେକ ସ୍ଥାନରେ କୋଇଲା ଜଳୁଥିବା ଦେଖାଯାଇଛି l ଅଗ୍ନି ନିୟନ୍ତ୍ରଣ ପାଇଁ ଭାରୀ ଯନ୍ତ୍ରପାତି ମାଧ୍ୟମରେ ଜଳୁଥିବା କୋଇଲାକୁ ହଟାଇବା ପ୍ରକ୍ରିୟା ଚାଲିଥିବା ମଧ୍ୟ ଦୃଶ୍ୟମାନ ହୋଇଛି l ତେବେ ବିପୁଳ ପରିମାଣର କୋଇଲା ଦୀର୍ଘ ସମୟ ଧରି ଜଳିଥିବା ଯଦି ସତ୍ୟ ହୁଏ, ତେବେ ଏଥିରେ କେତେ ପରିମାଣର କୋଇଲା ନଷ୍ଟ ହୋଇଛି ଏବଂ ସରକାରଙ୍କ ରାଜସ୍ୱରେ କେତେ କ୍ଷତି ଘଟିଛି—ତାହାକୁ ନେଇ ଏବେ ବଡ଼ ପ୍ରଶ୍ନ ଉଠିଛି l ଘଟଣାରେ କୋଟି କୋଟି ଟଙ୍କାର କୋଇଲା ନଷ୍ଟ ହୋଇଥିବା ନେଇ ସ୍ଥାନୀୟ ମହଲରେ ଚର୍ଚ୍ଚା ହେଉଥିଲେ ମଧ୍ୟ କ୍ଷତିର ପ୍ରକୃତ ପରିମାଣ ସମ୍ପର୍କରେ କୌଣସି ସରକାରୀ ହିସାବ ସାର୍ବଜନୀନ ହୋଇନାହିଁ l
“ଧୂଆଁକୁ ନେଇ ପରିବେଶ ଚିନ୍ତା”

କୋଇଲା ଡମ୍ପ ୟାର୍ଡରୁ ନିରନ୍ତର ବାହାରୁଥିବା ଘନ ଧୂଆଁକୁ ନେଇ ଆଖପାଖ ଅଞ୍ଚଳର ଲୋକଙ୍କ ମଧ୍ୟରେ ପରିବେଶ ଓ ଜନସ୍ୱାସ୍ଥ୍ୟକୁ ନେଇ ଚିନ୍ତା ବଢ଼ିଛି l କୋଇଲା ଦୀର୍ଘ ସମୟ ଧରି ଜଳିଲେ ବାୟୁର ଗୁଣବତ୍ତା ଉପରେ ଏହାର ପ୍ରଭାବ ପଡ଼ିବାର ଆଶଙ୍କା ରହିଥିବାରୁ ଘଟଣାସ୍ଥଳର ବାୟୁମାନ ଓ ପରିବେଶୀୟ ପ୍ରଭାବର ତୁରନ୍ତ ଯାଞ୍ଚ କରାଯିବାକୁ ଦାବି ହୋଇଛି l ସ୍ଥାନୀୟ ଲୋକଙ୍କ ଦାବି, ଘଟଣାକୁ କେବଳ କୋଇଲାରେ ନିଆଁ ଲାଗିବାର ଏକ ସାଧାରଣ ଘଟଣା ଭାବେ ନଦେଖି ଏହା ପଛର କାରଣ, ଅଗ୍ନି ନିରାପତ୍ତା ବ୍ୟବସ୍ଥା, ନିଆଁ ନିୟନ୍ତ୍ରଣରେ ନିଆଯାଇଥିବା ପଦକ୍ଷେପ ଏବଂ ଧୂଆଁର ପରିବେଶୀୟ ପ୍ରଭାବ ସମ୍ପର୍କରେ ନିରପେକ୍ଷ ତଦନ୍ତ କରାଯାଉ l
“ମେରା କିୟା କିୟା ଯାତା ହୈ’ ଉତ୍ତରକୁ ନେଇ ବିବାଦ”
ଘଟଣାଠାରୁ ଅଧିକ ଏବେ କମ୍ପାନୀ ଅଧିକାରୀଙ୍କ ଆଭିମୁଖ୍ୟକୁ ନେଇ ପ୍ରଶ୍ନ ଉଠିଛି l ସ୍ଥାନୀୟ ଲୋକେ ଡମ୍ପ ୟାର୍ଡରେ ନିଆଁ ଲାଗିବା ଓ ଧୂଆଁ ସମ୍ପର୍କରେ ପ୍ରଶ୍ନ କରିବା ସମୟରେ କମ୍ପାନୀର ଜଣେ ଅଧିକାରୀଙ୍କ ପକ୍ଷରୁ ‘ମେରା କିୟା ଯାତା ହୈ’ ଭଳି ଉତ୍ତର ଦିଆଯାଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି l ତେବେ ଏହି ଅଭିଯୋଗର ସ୍ୱତନ୍ତ୍ର ସତ୍ୟାପନ ହୋଇନାହିଁ l ଯଦି ଏପରି ମନୋଭାବ ପ୍ରକାଶ ପାଇଥାଏ, ତେବେ କୋଇଲା ଉତ୍ତୋଳନ ସହ ପରିବେଶ ସୁରକ୍ଷା, ଅଗ୍ନି ନିରାପତ୍ତା ଏବଂ ସ୍ଥାନୀୟ ଲୋକଙ୍କ ପ୍ରତି କମ୍ପାନୀର ଦାୟିତ୍ୱବୋଧ ନେଇ ସ୍ୱାଭାବିକ ଭାବେ ପ୍ରଶ୍ନ ଉଠିବା ନିଶ୍ଚିତ l ଏଭଳି ଘଟଣାରେ ପ୍ରଶ୍ନ ହେବା ଉଚିତ ‘ଦାୟିତ୍ୱ କାହାର ?’ ନୁହେଁ, ବରଂ ‘ଦାୟିତ୍ୱ କିଏ ନେବ? I
“ସ୍ୱାଧୀନ ତଦନ୍ତ ଦାବି”

ଡମ୍ପ ୟାର୍ଡରେ ନିଆଁ ଲାଗିବାର ପ୍ରକୃତ କାରଣ କ’ଣ, କେତେ ପରିମାଣ କୋଇଲା ନଷ୍ଟ ହୋଇଛି, ଏଥିରୁ ସରକାରଙ୍କ ରାଜସ୍ୱରେ କେତେ କ୍ଷତି ଘଟିଛି, ଅଗ୍ନି ନିର୍ବାପଣ ବ୍ୟବସ୍ଥା କେତେ ପ୍ରଭାବଶାଳୀ ଥିଲା ଏବଂ ଘନ ଧୂଆଁ ଯୋଗୁଁ ପରିବେଶ ଉପରେ କି ପ୍ରଭାବ ପଡ଼ିଛି ଏସବୁ ଦିଗର ତଦନ୍ତ ଆବଶ୍ୟକ ବୋଲି ସ୍ଥାନୀୟ ଲୋକେ ଦାବି କରିଛନ୍ତି l ଏଥିସହ ଘଟଣାସ୍ଥଳର ବାୟୁମାନ ପରୀକ୍ଷା, ନଷ୍ଟ ହୋଇଥିବା କୋଇଲାର ବୈଜ୍ଞାନିକ ଆକଳନ ଏବଂ ଅଗ୍ନି ନିୟନ୍ତ୍ରଣ ବ୍ୟବସ୍ଥାର ଯାଞ୍ଚ କରାଯାଇ ରିପୋର୍ଟ ସାର୍ବଜନୀନ କରିବାକୁ ମଧ୍ୟ ଦାବି ଉଠିଛି l କୋଇଲା ସମ୍ପଦର ସୁରକ୍ଷା ସହିତ ପରିବେଶ ଓ ଜନସାଧାରଣଙ୍କ ସ୍ୱାର୍ଥକୁ ସମାନ ଗୁରୁତ୍ୱ ଦେବା ହିଁ ଏଭଳି ଘଟଣାରେ ଦାୟିତ୍ୱଶୀଳ ପଦକ୍ଷେପ ବୋଲି ମତ ପ୍ରକାଶ ପାଇଛି l