ପୁଲକେଶ୍ୱର ମିଶ୍ର/ସ୍ୱତନ୍ତ୍ର ପ୍ରତିନିଧି/ସମୀକ୍ଷା ନ୍ୟୁଜ୍:ତାରିଖ: ୧୫ ଅକ୍ଟୋବର ୨୦୨୬
ତାଳଚେର ,ଅନୁଗୋଳ : ଡୁଡୁମା ଜଳପ୍ରପାତର ଅପରୂପ ସୌନ୍ଦର୍ଯ୍ୟ ସାଙ୍ଗକୁ ୧୦୪ ବର୍ଷୀୟ ଯୋଗୀ ବାବା: ପର୍ଯ୍ୟଟନର ବିକାଶ ନେଇ ସରକାରୀ ଦୃଷ୍ଟି ଆକର୍ଷଣ ପ୍ରକୃତିର ଅପୂର୍ବ ସୌନ୍ଦର୍ଯ୍ୟ ଭରା ତଥା ରାଜ୍ୟର ଅନ୍ୟତମ ପ୍ରମୁଖ ପର୍ଯ୍ୟଟନ ସ୍ଥଳୀ ଡୁଡୁମା ଜଳପ୍ରପାତର ପ୍ରବେଶ ଦ୍ୱାର ନିକଟରେ ଏକ ବିରଳ ତଥା ଆଶ୍ଚର୍ଯ୍ୟଜନକ ଦୃଶ୍ୟ ଦେଖିବାକୁ ମିଳିଛି। ଏଠାରେ ଜଣେ ୧୦୪ ବର୍ଷ ବୟସ୍କ ବାବାଙ୍କୁ ଦେଖିବାକୁ ମିଳିଛି, ଯିଏକି ଆଜିର ଆଧୁନିକ ତଥା ରୋଗଗ୍ରସ୍ତ ସମୟରେ ଏକ ସୁସ୍ଥ ଏବଂ ନିରୋଗ ଜୀବନର ଜ୍ୱଳନ୍ତ ଉଦାହରଣ ପାଲଟିଛନ୍ତି। ବାବାଙ୍କ ଏହି ଦୀର୍ଘ ଜୀବନ ଏବଂ ନିରୋଗ ଶରୀର ପଛର ରହସ୍ୟ ହେଉଛି କେବଳ ଯୋଗ ଏବଂ ସାଧାରଣ ଫଳାହାର। ସେ କୌଣସି ରାନ୍ଧଣା ଖାଦ୍ୟ ନ ଖାଇ କେବଳ ଅଳ୍ପ କିଛି ଫଳମୂଳ ଆହାର ଭାବେ ଗ୍ରହଣ କରନ୍ତି। ନିୟମିତ ଯୋଗାଭ୍ୟାସ ଏବଂ କଠୋର ନୀତି ନିୟମ ପାଳନ କରି ସେ ଏହି ବୟସରେ ମଧ୍ୟ ସମ୍ପୂର୍ଣ୍ଣ ସୁସ୍ଥ ଅଛନ୍ତି। ଏହି ଅବସରରେ ସେଠାରେ ଉପସ୍ଥିତ ଥିବା ଦର୍ଶକଙ୍କୁ ସେ ନିଜର କିଛି ଯୋଗାସନ ମଧ୍ୟ କରି ଦେଖାଇଥିଲେ, ଯାହା ତାଙ୍କ ଶରୀରର ନମନୀୟତା ଓ ସ୍ଫୁର୍ତ୍ତିର ପ୍ରମାଣ ଦେଉଥିଲା। ଏହି ବାବାଙ୍କ ଜୀବନଶୈଳୀ ଆମ ସମସ୍ତଙ୍କ ପାଇଁ ଏକ ବଡ଼ ପ୍ରେରଣା ସାଜିଛି।
ଅନ୍ୟପକ୍ଷରେ, ଡୁଡୁମା ଜଳପ୍ରପାତର ପ୍ରାକୃତିକ ସୌନ୍ଦର୍ଯ୍ୟ ଯେତିକି ମନୋମୁଗ୍ଧକର, ଏହାର ରକ୍ଷଣାବେକ୍ଷଣ ଓ ବିକାଶ ନେଇ ସେତିକି ଆବଶ୍ୟକତା ରହିଛି। ଏହି ସ୍ଥାନଟିକୁ ଯଦି ସରକାରଙ୍କ ପକ୍ଷରୁ ସଠିକ୍ ଭାବେ ବିକଶିତ କରାଯାଏ, ତେବେ ଏହା ଆହୁରି ମନୋରମ ହୋଇପାରନ୍ତା। ପର୍ଯ୍ୟଟନ ଭିତ୍ତିଭୂମିର ଉନ୍ନତି ହେଲେ କେବଳ ଦେଶର ବିଭିନ୍ନ ପ୍ରାନ୍ତରୁ ନୁହେଁ, ବରଂ ବହୁ ସଂଖ୍ୟାରେ ବୈଦେଶିକ ପର୍ଯ୍ୟଟକମାନେ (ଫରେନ୍ ଟୁରିଷ୍ଟ) ମଧ୍ୟ ଏଠାକୁ ଆକୃଷ୍ଟ ହେବେ। ବିଦେଶୀ ପର୍ଯ୍ୟଟକଙ୍କ ଆଗମନ ଦ୍ୱାରା ରାଜ୍ୟ ତଥା ଦେଶର ଅର୍ଥନୀତି ସୁଦୃଢ଼ ହେବା ସହ ସ୍ଥାନୀୟ ଅଞ୍ଚଳରେ ରୋଜଗାରର ବାଟ ଫିଟିପାରିବ। ତେଣୁ ସରକାର ତୁରନ୍ତ ଡୁଡୁମା ଜଳପ୍ରପାତର ପାରିପାର୍ଶ୍ୱିକ ଉନ୍ନତି ଏବଂ ପର୍ଯ୍ୟଟନ ବିକାଶ ଦିଗରେ ସ୍ୱତନ୍ତ୍ର ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
