ରବୀନ୍ଦ୍ର କୁମାର ସାହୁ / ନୂଆଗାଁ ପ୍ରତିନିଧି / ସମୀକ୍ଷା ନ୍ୟୁଜ୍ / ନୟାଗଡ଼
ନୂଆଗାଁ, ୨୮/୦୯: ଖାଦ୍ୟ ସୁରକ୍ଷା ଯୋଜନାରେ ସାମିଲ କରାଇ ରାସନ୍ କାର୍ଡ କରାଇଦେବା ନାଁରେ ଏକ ଗରିବ ପରିବାରଠାରୁ ୬ ହଜାର ଟଙ୍କା ନିଆଯାଇଥିବା ନେଇ ନୟାଗଡ଼ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ବେରୁଆବାରୀ ପଞ୍ଚାୟତରୁ ଅଭିଯୋଗ ସାମ୍ନାକୁ ଆସିଛି। ବେରୁଆବାରୀ ପଞ୍ଚାୟତର ଜଦୁପଲ୍ଲୀ ଗ୍ରାମ ଖୋଜାପଲ୍ଲୀ ସାହିର ମଙ୍ଗରାଜ ବାରିକଙ୍କ ସ୍ତ୍ରୀ ପ୍ରମିଳା ବାରିକ ଏହି ଅଭିଯୋଗ କରିଛନ୍ତି। ତାଙ୍କ କହିବା ଅନୁଯାୟୀ, ପରିବାର ଦିନମଜୁରି କରି ଜୀବିକା ନିର୍ବାହ କରୁଥିବା ବେଳେ ଖାଦ୍ୟ ସୁରକ୍ଷା ଯୋଜନାରେ ସାମିଲ ହୋଇପାରିନଥିଲେ। ପ୍ରମିଳାଙ୍କ ଅଭିଯୋଗ ଅନୁସାରେ, ରାସନ୍ କାର୍ଡ କରାଇଦେବା ପାଇଁ ଖର୍ଚ୍ଚ ହେବ ବୋଲି କହି ସ୍ଥାନୀୟ ସରପଞ୍ଚ ସୁଶାନ୍ତ କୁମାର ସାହୁ ପ୍ରାୟ ଚାରି ମାସ ତଳେ ତାଙ୍କଠାରୁ ୬ ହଜାର ଟଙ୍କା ନେଇଥିଲେ। ପରବର୍ତ୍ତୀ ସମୟରେ ତାଙ୍କୁ ଏକ ରାସନ୍ କାର୍ଡ ଦିଆଯାଇଥିଲେ ମଧ୍ୟ ତାହା ଏପର୍ଯ୍ୟନ୍ତ କାର୍ଯ୍ୟକ୍ଷମ ହୋଇନଥିବା ଏବଂ ସେଥିରେ ଚାଉଳ ମିଳୁନଥିବା ସେ ଅଭିଯୋଗ କରିଛନ୍ତି। ଦିନମଜୁରି କରି ପରିବାର ଚଳାଉଥିବାରୁ ଏଭଳି ପରିସ୍ଥିତି ତାଙ୍କୁ ଆର୍ଥିକ ଓ ମାନସିକ ଭାବେ ଅସୁବିଧାରେ ପକାଇଥିବା ପ୍ରମିଳା କୋହଭରା କଣ୍ଠରେ କହିଛନ୍ତି।
ଏ ସମ୍ପର୍କରେ ନୂଆଗାଁ ଯୋଗାଣ ଅଧିକାରୀ ଜୀବନ କୁମାର ବେହେରାଙ୍କ ମତାମତ ନିଆଯିବାରୁ ସେ କହିଛନ୍ତି ଯେ, ରାସନ୍ କାର୍ଡ ପାଇଁ କୌଣସି ଟଙ୍କା ଦେବାକୁ ପଡ଼େନାହିଁ। ଯୋଗ୍ୟ ଗରିବ ପରିବାରଙ୍କୁ ସେବା ଯୋଗାଇବା ଏବଂ ନିୟମ ଅନୁଯାୟୀ ରାସନ୍ କାର୍ଡ ସୁବିଧା ପହଞ୍ଚାଇବା ବିଭାଗର ଦାୟିତ୍ୱ ବୋଲି ସେ କହିଛନ୍ତି।
ଅନ୍ୟପକ୍ଷରେ ଅଭିଯୋଗ ସମ୍ପର୍କରେ ବେରୁଆବାରୀ ସରପଞ୍ଚ ସୁଶାନ୍ତ କୁମାର ସାହୁଙ୍କ ପ୍ରତିକ୍ରିୟା ନେବା ପାଇଁ ସାମ୍ବାଦିକ ତାଙ୍କ ପାଖକୁ ଯାଇଥିଲେ। ମାତ୍ର ସରପଞ୍ଚଙ୍କ ସହ ସାକ୍ଷାତ ହୋଇପାରିନଥିଲା। ପରେ ଫୋନ୍ ଯୋଗେ ତାଙ୍କ ସହ ଯୋଗାଯୋଗ ପାଇଁ ଉଦ୍ୟମ କରାଯାଇଥିଲେ ମଧ୍ୟ ସେ ଫୋନ୍ କଲ୍ ଗ୍ରହଣ କରିନଥିବାରୁ ତାଙ୍କ ପ୍ରତିକ୍ରିୟା ମିଳିପାରିନାହିଁ। ଫଳରେ ଅଭିଯୋଗ ସମ୍ପର୍କରେ ସରପଞ୍ଚଙ୍କ ପକ୍ଷ ଜଣାପଡ଼ିନାହିଁ।
ଗରିବ ଓ ଶ୍ରମଜୀବୀ ପରିବାରଙ୍କ ପାଇଁ ଉଦ୍ଦିଷ୍ଟ ଖାଦ୍ୟ ସୁରକ୍ଷା ସୁବିଧା ପାଇଁ ଯଦି କୌଣସି ବ୍ୟକ୍ତିଙ୍କଠାରୁ ଅର୍ଥ ଆଦାୟ ହୋଇଥାଏ, ତେବେ ଏହାର ସତ୍ୟାସତ୍ୟ ପ୍ରଶାସନ ପକ୍ଷରୁ ଯାଞ୍ଚ କରାଯିବା ଆବଶ୍ୟକ ବୋଲି ଅଞ୍ଚଳରେ ମତ ପ୍ରକାଶ ପାଇଛି।
ଅଭିଯୋଗର ନିରପେକ୍ଷ ତଦନ୍ତ କରି ୬ ହଜାର ଟଙ୍କା କେଉଁ ବାବଦରେ ନିଆଯାଇଥିଲା, ରାସନ୍ କାର୍ଡ କାହିଁକି କାର୍ଯ୍ୟକ୍ଷମ ହୋଇନାହିଁ ଏବଂ ଏଥିରେ କୌଣସି ଅନିୟମିତତା ହୋଇଛି କି ନାହିଁ ତାହା ସ୍ପଷ୍ଟ କରିବାକୁ ଦାବି ହୋଇଛି। ତଦନ୍ତରେ ଅନିୟମିତତା ପ୍ରମାଣିତ ହେଲେ ଦାୟୀ ବ୍ୟକ୍ତିଙ୍କ ବିରୋଧରେ ନିୟମାନୁଯାୟୀ କାର୍ଯ୍ୟାନୁଷ୍ଠାନ ସହ ଯୋଗ୍ୟ ପରିବାରକୁ ଶୀଘ୍ର ରାସନ୍ ସୁବିଧା ଯୋଗାଇଦେବାକୁ ଦାବି ହୋଇଛି।
