ସମୀକ୍ଷା ନ୍ୟୁଜ ବ୍ୟୁରୋ /ନୂଆଦିଲ୍ଲୀ:
ଭାରତ ମୋବାଇଲ କଂଗ୍ରେସ (IMC)ର ଦଶମ ସଂସ୍କରଣରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ଯଶୋଭୂମିରେ ଉଦ୍ବୋଧନ ଦେଇଛନ୍ତି। ଏହି ବର୍ଷର IMCର ଥିମ୍ ହେଉଛି “Scale Without Boundaries”। ମୋଦୀଙ୍କ ଉଦ୍ବୋଧନର ମୁଖ୍ୟ ବିଷୟ- ପ୍ରଧାନମନ୍ତ୍ରୀ କହିଛନ୍ତି ଯେ ଡିଜିଟାଲ ଇଣ୍ଡିଆ ମାଧ୍ୟମରେ ପ୍ରଯୁକ୍ତିକୁ କେବଳ କିଛି ଲୋକଙ୍କ ସୁବିଧାରେ ସୀମିତ ନରଖି ସାଧାରଣ ଲୋକଙ୍କ ପାଖରେ ପହଞ୍ଚାଇବା ଉପରେ ଗୁରୁତ୍ୱ ଦିଆଯାଇଛି। ମୋବାଇଲ ଫୋନ୍ ଏହି ଡିଜିଟାଲ ପରିବର୍ତ୍ତନର ଏକ ପ୍ରମୁଖ ମାଧ୍ୟମ ହୋଇଛି। ସେ କହିଛନ୍ତି, ଗତ ୧୦–୧୨ ବର୍ଷରେ ମୋବାଇଲ ଫୋନ୍ କେବଳ ଯୋଗାଯୋଗର ମାଧ୍ୟମ ହୋଇ ରହିନାହିଁ; ଏହା ସୁଶାସନ, ଡିଜିଟାଲ ସେବା ଓ ନାଗରିକ ସୁବିଧାର ଏକ ଗୁରୁତ୍ୱପୂର୍ଣ୍ଣ ଉପକରଣରେ ପରିଣତ ହୋଇଛି।
5G ଓ ଡିଜିଟାଲ ଭାରତ
ମୋଦୀ ଭାରତର 5G ବିସ୍ତାରକୁ ମଧ୍ୟ ଉଲ୍ଲେଖ କରିଛନ୍ତି। ତାଙ୍କ ଅନୁସାରେ, ଦେଶର ପ୍ରତ୍ୟେକ ଜିଲ୍ଲାରେ 5G ପହଞ୍ଚିଛି ଏବଂ ୫.୫ ଲକ୍ଷରୁ ଅଧିକ 5G ବେସ୍ ଷ୍ଟେସନ୍ କାର୍ଯ୍ୟକ୍ଷମ ଅଛି। ୨୦୨୨ ତୁଳନାରେ ଭାରତର ମୋବାଇଲ ଇଣ୍ଟରନେଟ୍ ସ୍ପିଡ୍ ପ୍ରାୟ ୧୦ ଗୁଣ ବୃଦ୍ଧି ପାଇଥିବା କଥା ମଧ୍ୟ ସେ କହିଛନ୍ତି।
ସାଇବର ଠକେଇ ଓ Deepfake ଉପରେ ଚିନ୍ତା
ଡିଜିଟାଲ ବିକାଶ ସହିତ ବଢ଼ୁଥିବା ସାଇବର ଠକେଇ ଓ deepfake ଭଳି ଚ୍ୟାଲେଞ୍ଜ ଉପରେ ମଧ୍ୟ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଛନ୍ତି। ସୀମାପାର ସାଇବର ଅପରାଧକୁ ରୋକିବା ପାଇଁ ଟେଲିକମ୍ କମ୍ପାନୀ, ଆର୍ଥିକ ସଂସ୍ଥା ଓ ନିୟାମକମାନଙ୍କ ସହଯୋଗରେ ଏକ ବିଶ୍ୱସ୍ତରୀୟ ବ୍ୟବସ୍ଥା ଗଠନ କରିବାକୁ ସେ ଆହ୍ୱାନ ଦେଇଛନ୍ତି।
IMC 2026ର ବ୍ୟାପକତା
ଏହି ଚାରିଦିନିଆ ସମ୍ମିଳନୀ ଅକ୍ଟୋବର ୭ରୁ ୧୦ ପର୍ଯ୍ୟନ୍ତ ଚାଲିବ। ଏଥିରେ ୧୦୦ରୁ ଅଧିକ ଦେଶର ଅଂଶଗ୍ରହଣ, ୫୦୦ରୁ ଅଧିକ ପାର୍ଟନର ଓ ପ୍ରଦର୍ଶକ, ୬୦୦ରୁ ଅଧିକ ଷ୍ଟାର୍ଟଅପ୍ ଏବଂ ୯୦୦ରୁ ଅଧିକ ଚିନ୍ତକ/ବିଶେଷଜ୍ଞ ଯୋଗଦେବାର ଆଶା ରହିଛି। 5G/6G, AI ନେଟୱର୍କ, ସେମିକଣ୍ଡକ୍ଟର, ସାଇବର ସୁରକ୍ଷା, କ୍ୱାଣ୍ଟମ୍ କମ୍ୟୁନିକେସନ୍, ରୋବୋଟିକ୍ସ ଓ ସ୍ମାର୍ଟ ମୋବିଲିଟି ଭଳି କ୍ଷେତ୍ର ଏଠାରେ ମୁଖ୍ୟ ଆକର୍ଷଣ।
ମୋଦୀଙ୍କ ଉଦ୍ବୋଧନରେ ଡିଜିଟାଲ ସମାବେଶ, 5G/6G, ଦେଶୀୟ ଟେକ୍ନୋଲୋଜି ଉତ୍ପାଦନ, AI, ସାଇବର ସୁରକ୍ଷା ଓ ପ୍ରଯୁକ୍ତିକୁ ସାଧାରଣ ଲୋକଙ୍କ ଜୀବନ ସହ ଯୋଡ଼ିବା ଉପରେ ବିଶେଷ ଗୁରୁତ୍ୱ ରହିଛି।
