ସମୀକ୍ଷା ବ୍ୟୁରୋ ନ୍ୟୁଜ / ଭୁବନେଶ୍ୱର:
ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି ହିମାଚଳ ପ୍ରଦେଶର ରୋହତଙ୍ଗ୍ ସ୍ଥିତ ଅଟଳ ଟନେଲ ପରିଦର୍ଶନ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୨୦ରେ ଏହାକୁ ଉଦଘାଟନ କରିଥିଲେ। ରାଷ୍ଟ୍ରପତି ଅଟଳ ଟନେଲକୁ ଭାରତର ଏକ ଇଞ୍ଜନିୟରିଂ ଚମତ୍କାର ଭାବେ ବର୍ଣ୍ଣନା କରିଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି ହିମାଚଳ ପ୍ରଦେଶ ଗସ୍ତ ସମୟରେ ରୋହତଙ୍ଗ୍ସ୍ଥିତ ଅଟଳ ଟନେଲ ପରିଦର୍ଶନ କରିଛନ୍ତି। ଏହି ଗସ୍ତ ୬ରୁ ୮ ଅକ୍ଟୋବର ପର୍ଯ୍ୟନ୍ତ ତାଙ୍କ ହିମାଚଳ ପ୍ରଦେଶ ଯାତ୍ରାର ଅଂଶ। ଅଟଳ ଟନେଲରେ ରାଷ୍ଟ୍ରପତିଙ୍କ ଗସ୍ତ,ରାଷ୍ଟ୍ରପତି ମୁର୍ମୁ ଅଟଳ ଟନେଲରେ ପହଞ୍ଚିବା ପରେ ସୀମା ସଡ଼କ ସଂଗଠନ (BRO)ର ଅଧିକାରୀମାନଙ୍କ ସହ ଆଲୋଚନା କରିଥିଲେ। ଟନେଲର ନିର୍ମାଣ, ପରିଚାଳନା ଓ ସୁରକ୍ଷା ବ୍ୟବସ୍ଥା ସମ୍ପର୍କରେ ତାଙ୍କୁ ଅଧିକାରୀମାନେ ସୂଚନା ଦେଇଥିଲେ। ଏହି ସମୟରେ ଅଞ୍ଚଳରେ ବରଫପାତ ମଧ୍ୟ ହେଉଥିଲା। ରାଷ୍ଟ୍ରପତି ଅଟଳ ଟନେଲକୁ ବିଶ୍ୱସ୍ତରୀୟ ଇଞ୍ଜିନିୟରିଂର ଏକ ଅଦ୍ଭୁତ ଉଦାହରଣ ବୋଲି ବର୍ଣ୍ଣନା କରିବା ସହିତ ଏହାର ନିର୍ମାଣରେ BRO ଅଧିକାରୀ ଓ ଯବାନଙ୍କ ସମର୍ପଣକୁ ପ୍ରଶଂସା କରିଛନ୍ତି। ତାଙ୍କ ମତରେ, ଏହି ପ୍ରକଳ୍ପ ଭାରତର ପ୍ରଯୁକ୍ତିଗତ କ୍ଷମତା, ଦୃଢ଼ ସଙ୍କଳ୍ପ ଏବଂ କଠିନ ପାହାଡ଼ିଆ ଅଞ୍ଚଳରେ ନିରବଚ୍ଛିନ୍ନ ଯୋଗାଯୋଗ ସୁନିଶ୍ଚିତ କରିବାର ପ୍ରତିବଦ୍ଧତାକୁ ପ୍ରକାଶ କରେ।
ଅଟଳ ଟନେଲ କାହିଁକି ଗୁରୁତ୍ୱପୂର୍ଣ୍ଣ?
ଅଟଳ ଟନେଲ ରୋହତଙ୍ଗ ପାସ୍ ତଳେ ନିର୍ମିତ ୯.୦୨ କିଲୋମିଟର ଲମ୍ବା ଏକ ପ୍ରମୁଖ ହାଇୱେ ଟନେଲ। ଏହା ମନାଲିକୁ ଲାହୌଲ-ସ୍ପିତି ଉପତ୍ୟକା ସହିତ ବର୍ଷର ସମସ୍ତ ସମୟରେ ଯୋଡ଼ି ରଖିବାରେ ସହାୟକ ହୋଇଛି। ପୂର୍ବରୁ ଭାରି ବରଫପାତ ଯୋଗୁଁ ଏହି ଅଞ୍ଚଳ ବର୍ଷର କିଛି ମାସ ଯାତାୟାତରୁ ବିଚ୍ଛିନ୍ନ ହୋଇଯାଉଥିଲା। ଏହା କେବଳ ସ୍ଥାନୀୟ ଲୋକ ଓ ପର୍ଯ୍ୟଟକଙ୍କ ଯାତାୟାତକୁ ସହଜ କରିନାହିଁ, ବରଂ ହିମାଳୟର ସୀମାନ୍ତ ଅଞ୍ଚଳ ସହ ଯୋଗାଯୋଗ ଦୃଷ୍ଟିରୁ ମଧ୍ୟ ଏହାର ଗୁରୁତ୍ୱ ରହିଛି। ଟନେଲର ଉଦ୍ଘାଟନ ୨୦୨୦ ମସିହାରେ ହୋଇଥିଲା
ରାଷ୍ଟ୍ରପତିଙ୍କ ହିମାଚଳ ଗସ୍ତ
ରାଷ୍ଟ୍ରପତିଙ୍କ ୬–୮ ଅକ୍ଟୋବର ହିମାଚଳ ଗସ୍ତରେ ଅନ୍ୟାନ୍ୟ କାର୍ଯ୍ୟକ୍ରମ ମଧ୍ୟ ରହିଛି। ୬ ଅକ୍ଟୋବରରେ ସେ AIIMS ବିଳାସପୁରର ପ୍ରଥମ ସମାବର୍ତ୍ତନ ସମାରୋହରେ ଯୋଗ ଦେଇଥିଲେ। ୭ ଅକ୍ଟୋବରରେ ଅଟଳ ଟନେଲ ସହ ମନାଲିର ଐତିହାସିକ ହିଡିମ୍ବା ମନ୍ଦିର ମଧ୍ୟ ପରିଦର୍ଶନ କରିଥିବା ଜଣାପଡ଼ିଛି। ଅଟଳ ଟନେଲ ପରିଦର୍ଶନ ମାଧ୍ୟମରେ ରାଷ୍ଟ୍ରପତି ମୁର୍ମୁ ଭାରତର ପାହାଡ଼ିଆ ଓ ସୀମାନ୍ତ ଅଞ୍ଚଳରେ ଭିତ୍ତିଭୂମି, ଯୋଗାଯୋଗ ଏବଂ ଇଞ୍ଜିନିୟରିଂ କ୍ଷମତାର ଗୁରୁତ୍ୱ ଉପରେ ଆଲୋକପାତ କରିଛନ୍ତି।
