ଦୁର୍ଗେଶ ନନ୍ଦନ ମହାପାତ୍ର /ସମୀକ୍ଷା ନ୍ୟୁଜ/ଭୁବନେଶ୍ୱର
ଭୁବନେଶ୍ୱର ବିଜେବି ନଗର (BJB Nagar) ଅଞ୍ଚଳର କ୍ୟାରମ ଫିଲଡ଼ ଗଣେଶ ପୂଜା ଚଳିତ ବର୍ଷ ରାଜଧାନୀର ସବୁଠାରୁ ଆକର୍ଷଣୀୟ ଏବଂ ଚର୍ଚ୍ଚିତ ପୂଜା ମଣ୍ଡପଗୁଡ଼ିକ ମଧ୍ୟରେ ଅନ୍ୟତମ ପାଲଟିଛି। କ୍ୟାରମ ଫିଲଡ଼ ୟୁଥ୍ ଆସୋସିଏସନ (Carrom Field Youth Association) ପକ୍ଷରୁ ଏଠାରେ ଏକ ୫୩ ଫୁଟ୍ ଉଚ୍ଚତାର ବିଶାଳ ଓ ଦିବ୍ୟ ଗଣେଶ ମୂର୍ତ୍ତି ସ୍ଥାପନ କରାଯାଇଛି, ଯାହା ଶ୍ରଦ୍ଧାଳୁଙ୍କ ପାଇଁ ମୁଖ୍ୟ ଆକର୍ଷଣ ସାଜିଛି।
ଭୁବନେଶ୍ୱର ବିଜେବି ନଗରର କ୍ୟାରମ ଫିଲଡ଼ ଗଣେଶ ପୂଜା ମଣ୍ଡପ (Carrom Field Youth Association) ତରଫରୁ ଚଳିତ ବର୍ଷ ଶ୍ରଦ୍ଧାଳୁ ଓ ଦର୍ଶକମାନଙ୍କ ମନୋରଞ୍ଜନ ପାଇଁ ବିଶେଷ ମେଲୋଡି ଓ ଲାଇଭ୍ ମ୍ୟୁଜିକ୍ ନାଇଟ୍ (Melody & Live Concert) ର ଆୟୋଜନ କରାଯାଇଥିଲା | ଏହି ମେଲୋଡି କାର୍ଯ୍ୟକ୍ରମଗୁଡ଼ିକ ସର୍ବସାଧାରଣଙ୍କ ପାଇଁ ସମ୍ପୂର୍ଣ୍ଣ ମାଗଣା ଥିଲା, ଯାହାକୁ ଉପଭୋଗ କରିବା ପାଇଁ ରାଜଧାନୀର ବିଭିନ୍ନ ପ୍ରାନ୍ତରୁ ହଜାର ହଜାର ସଂଖ୍ୟାରେ ଯୁବପିଢ଼ି ଓ ସଙ୍ଗୀତ ପ୍ରେମୀଙ୍କ ଭିଡ଼ ଜମିଥିଲା। ଗତକାଲି ଶନିବାର ଦିନ ଓଲିଉଡ଼ ପ୍ରସିଦ୍ଧ ଗାୟିକା ଅସୀମା ପଣ୍ଡା ମେଲୋଡି ପରିବେଷଣ କରି ଦର୍ଶକଙ୍କୁ ମତୁଆଲା କରିଥିବାବେଳେ ଆଜି ଅନ୍ତରା ଚକ୍ରବର୍ତ୍ତୀଙ୍କ ମେଲୋଡି କାର୍ଯ୍ୟକ୍ରମ ରହିଛି | ଚଳିତ ବର୍ଷ ଏହି ପୂଜା ମଣ୍ଡପର ଲାଇଟିଂ ଏବଂ ଗେଟ୍ ରଙ୍ଗବିରଙ୍ଗୀ ଆଲୋକରେ ଝଲସି ଉଠୁଛି, ଯାହାକୁ ଦେଖିବା ପାଇଁ ପ୍ରତିଦିନ ସନ୍ଧ୍ୟାରେ ପ୍ରବଳ ଜନଗହଳି ପରିଲକ୍ଷିତ ହେଉଛି। ସୋସିଆଲ ମିଡିଆ ଏବଂ ସ୍ଥାନୀୟ ଲୋକଙ୍କ ମଧ୍ୟରେ ଏହି ପୂଜାର ଶାନ୍ତିପୂର୍ଣ୍ଣ ମାହୋଲ ଏବଂ ଆଧ୍ୟାତ୍ମିକ ପରିବେଶ ବେଶ୍ ଭାଇରାଲ୍ ହେବାରେ ଲାଗିଛି।
କମିଶନରେଟ ପୋଲିସର ନିୟମ ଅନୁଯାୟୀ, ଆଜି (ରବିବାର) ସହରର ବିଭିନ୍ନ ପ୍ରମୁଖ ମଣ୍ଡପଗୁଡ଼ିକର ମୂର୍ତ୍ତି ଭସାଣି ପ୍ରକ୍ରିୟା ଧାର୍ଯ୍ୟ ହୋଇଛି। ଏହି ସମୟରେ କୌଣସି ପ୍ରକାରର ଡିଜେ (DJ) କିମ୍ବା ବାଣ ଫୁଟାଇବା ଉପରେ ସମ୍ପୂର୍ଣ୍ଣ କଟକଣା ରହିଛି। କ୍ୟାରମ ଫିଲଡ଼ର ସ୍ୱେଚ୍ଛାସେବୀ ଓ ସ୍ଥାନୀୟ ପୋଲିସ ମିଳିତ ଭାବେ ଶୃଙ୍ଖଳିତ ଦର୍ଶନ ଓ ଭସାଣି ପାଇଁ ସଜାଗ ଅଛନ୍ତି। 
