ସାନନ୍ଦ ମହାପାତ୍ର / ସ୍ଵତନ୍ତ୍ର ପ୍ରତିନିଧି / ବରଗଡ / ସମୀକ୍ଷା ନିଯୁଜ୍
ବରଗଡ଼; ଭାରତ ନିର୍ବାଚନ କମିଶନଙ୍କ ନିର୍ଦ୍ଦେଶକ୍ରମେ ସ୍ୱତନ୍ତ୍ର ସଘନ ଭୋଟର ତାଲିକା ସଂଶୋଧନ (SIR) ପ୍ରକ୍ରିୟା ଶେଷ ହେବା ପରେ, ବରଗଡ଼ ଜିଲ୍ଲାରେ ବାଦ୍ ପଡ଼ିଥିବା ଏବଂ ପ୍ରଥମ ଥର ପାଇଁ ମତାଧିକାର ସାବ୍ୟସ୍ତ କରିବାକୁ ଥିବା ଯୁବକଯୁବତୀମାନଙ୍କ ପାଇଁ ଏକ ବିଶେଷ ନାମ ପଞ୍ଜୀକରଣ ଅଭିଯାନ ଆରମ୍ଭ କରାଯାଉଛି। ଏହି ସମ୍ପର୍କରେ ବରଗଡ଼ ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ଏକ ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛନ୍ତି। ଏହି ଅଭିଯାନ ଅଧୀନରେ ବୁଥ୍ ସ୍ତରୀୟ ଅଧିକାରୀ (BLO) ମାନେ ପୂର୍ବ ଭୋଟର ତାଲିକା ସହ ବର୍ତ୍ତମାନର ଚୂଡ଼ାନ୍ତ ତାଲିକାକୁ ତୁଳନା କରିବେ। ଯେଉଁ ଯୋଗ୍ୟ ଭୋଟରଙ୍କ ନାମ କୌଣସି କାରଣରୁ ବାଦ୍ ପଡ଼ିଛି, ସେମାନଙ୍କୁ ଚିହ୍ନଟ କରାଯାଇ ପ୍ରତି ସପ୍ତାହରେ ଅତି କମରେ ୨୦ ରୁ ୨୫ ଜଣଙ୍କ ଘରକୁ ଯାଇ ସ୍ଥିତି ଯାଞ୍ଚ କରାଯିବ। BLO ମାନେ ଘରକୁ ଘର ବୁଲି (H2H) ଯାଞ୍ଚ କରିବା ସହ ଫର୍ମ-୬ (Form 6) ମାଧ୍ୟମରେ ନୂତନ ଓ କଟିଯାଇଥିବା ନାଗରିକଙ୍କ ନାମ ପଞ୍ଜୀକରଣ ସୁନିଶ୍ଚିତ କରିବେ।
ଏହି ସମ୍ପୂର୍ଣ୍ଣ ପ୍ରକ୍ରିୟା ଏକ ମାସ ମଧ୍ୟରେ ଶେଷ ହେବ। ରାଜନୈତିକ ସମନ୍ୱୟ ରକ୍ଷା କରିବା ପାଇଁ ଏହି ପ୍ରସ୍ତୁତ ତାଲିକାକୁ ସ୍ୱୀକୃତିପ୍ରାପ୍ତ ରାଜନୈତିକ ଦଳର ବୁଥ୍ ସ୍ତରୀୟ ଏଜେଣ୍ଟ (BLA) ମାନଙ୍କ ସହ ସେୟାର କରାଯିବ, ଯଦ୍ଦ୍ୱାରା ସେମାନେ ମଧ୍ୟ କୌଣସି ବାଦ୍ ପଡ଼ିଥିବା ଭୋଟରଙ୍କୁ ସାମିଲ କରିବାରେ ସହଯୋଗ କରିପାରିବେ। ଏହା ବ୍ୟତୀତ ଜିଲ୍ଲାରେ ସ୍ୱତନ୍ତ୍ର ଭୋଟର କ୍ୟାମ୍ପ ଆୟୋଜନ କରାଯିବ। ବିଶେଷ କରି ଶ୍ରମିକ ବସ୍ତି, ନିରାଶ୍ରୟ ଆଶ୍ରୟସ୍ଥଳୀ ଓ ମୌଳିକ ସୁବିଧାରୁ ବଞ୍ଚିତ ବାସହୀନ ଲୋକଙ୍କ ପାଇଁ ସ୍ୱତନ୍ତ୍ର ଶିବିର ହେବ। ଜିଲ୍ଲାର ସମସ୍ତ ଶିକ୍ଷାନୁଷ୍ଠାନ ଏବଂ ‘ସ୍ୱିପ୍’ (SVEEP) କାର୍ଯ୍ୟକ୍ରମ ମାଧ୍ୟମରେ ବ୍ୟାପକ ସଚେତନତା ସୃଷ୍ଟି କରାଯିବ। ଜିଲ୍ଲାପାଳ ସମସ୍ତ ଯୋଗ୍ୟ ନାଗରିକଙ୍କୁ ନିଜର ଗଣତାନ୍ତ୍ରିକ ଅଧିକାରର ସୁରକ୍ଷା ପାଇଁ ଏହି ସୁଯୋଗର ଲାଭ ଉଠାଇବାକୁ ଅନୁରୋଧ କରିଛନ୍ତି।
