ମହେଶ୍ୱର ଡିଗାଲ /ସବ ଡିଭିଜନାଲ ସାମ୍ବାଦିକ /ସମୀକ୍ଷା ନିୟୁଜ :
ଦାରିଙ୍ଗବାଡ଼ି, କନ୍ଧମାଳ : ତା 16/11/26 କନ୍ଧମାଳ ଜିଲ୍ଲାର ଐତିହ୍ୟ, ପରମ୍ପରା ଓ ଆଦିବାସୀ ସଂସ୍କୃତିର ଅନନ୍ୟ ଝଲକ ଦେଖିବାକୁ ମିଳିଥିଲା ଦାରିଙ୍ଗବାଡ଼ି ଇକୋ ରିଟ୍ରିଟ୍ର ଉଦ୍ଘାଟନୀ ଉତ୍ସବରେ। ପ୍ରକୃତିର ମନୋରମ ପରିବେଶ ମଧ୍ୟରେ କନ୍ଧମାଳର ବିଭିନ୍ନ ଜନଜାତି ଓ କୁଇ ସମ୍ପ୍ରଦାୟର ପାରମ୍ପରିକ ସାଂସ୍କୃତିକ ଦଳ ନିଜ ନିଜର ଲୋକନୃତ୍ୟ, ଲୋକଗୀତ ଓ ପାରମ୍ପରିକ ବାଦ୍ୟଯନ୍ତ୍ର ପରିବେଷଣ କରି ସମଗ୍ର ପରିବେଶକୁ ଉତ୍ସବମୁଖର କରିଦେଇଥିଲେ। ବାଲିଗୁଡ଼ା ଉପଜିଲ୍ଲାପାଳ ପ୍ରଣୀତ ଦାସ ଉଦ୍ଘାଟନୀ ସ୍ଥଳରେ ପହଞ୍ଚିବା ପରେ ତାଙ୍କୁ କନ୍ଧମାଳର ପାରମ୍ପରିକ ରୀତିନୀତି ଓ ଆଦିବାସୀ ସଂସ୍କୃତି ଅନୁଯାୟୀ ଭବ୍ୟ ସ୍ୱାଗତ କରାଯାଇଥିଲା। ପାରମ୍ପରିକ ବେଶଭୂଷାରେ ସଜ୍ଜିତ କଳାକାରମାନେ ନୃତ୍ୟ ଓ ସଙ୍ଗୀତ ମାଧ୍ୟମରେ ଅତିଥିମାନଙ୍କୁ ସ୍ୱାଗତ ଜଣାଇଥିଲେ। ଏହି ସ୍ୱାଗତ ପର୍ବ କନ୍ଧମାଳର ଅତିଥି ସତ୍କାର ଓ ସାଂସ୍କୃତିକ ମହାନତାର ପରିଚୟ ଦେଇଥିଲା। ଏହାପରେ ଜିଲ୍ଲାର ବିଭିନ୍ନ ଅଞ୍ଚଳରୁ ଆସିଥିବା କଳାକାରମାନେ ପର୍ଯ୍ୟାୟକ୍ରମେ ନିଜର ପାରମ୍ପରିକ କଳା ପରିବେଷଣ କରିଥିଲେ। ଢୋଲ, ମହୁରୀ ଓ ଅନ୍ୟାନ୍ୟ ପାରମ୍ପରିକ ବାଦ୍ୟର ତାଳେ ତାଳେ କଳାକାରଙ୍କ ନୃତ୍ୟ ଦର୍ଶକଙ୍କ ମନ ମୋହିଥିଲା। କୁଇ ଜନଜାତିର ପାରମ୍ପରିକ ଗୀତ ଓ ନୃତ୍ୟ ମାଧ୍ୟମରେ ନିଜ ମାଟିର ଐତିହ୍ୟ, ସାମାଜିକ ଜୀବନଶୈଳୀ ଓ ପ୍ରକୃତି ସହ ମଣିଷର ନିବିଡ଼ ସମ୍ପର୍କକୁ ପ୍ରକାଶ କରାଯାଇଥିଲା। କଳାକାରମାନଙ୍କ ଉତ୍ସାହ, ଉଦ୍ଦୀପନା ଓ ଆକର୍ଷଣୀୟ ପରିବେଷଣ ଉପସ୍ଥିତ ଅତିଥି ଓ ଦର୍ଶକଙ୍କୁ ବେଶ୍ ଆନନ୍ଦିତ କରିଥିଲା। ଏହା କେବଳ ଏକ ମନୋରଞ୍ଜନ କାର୍ଯ୍ୟକ୍ରମ ନଥିଲା, ବରଂ କନ୍ଧମାଳର ଲୋକକଳା, ଭାଷା, ପରମ୍ପରା ଓ ଆଦିବାସୀ ପରିଚୟକୁ ଅନ୍ୟମାନଙ୍କ ନିକଟରେ ପହଞ୍ଚାଇବାର ଏକ ସୁନ୍ଦର ମାଧ୍ୟମ ଥିଲା। ବର୍ତ୍ତମାନ ସମୟରେ ଆଧୁନିକତାର ପ୍ରଭାବରେ ଅନେକ ପାରମ୍ପରିକ ଲୋକକଳା ଓ ସଂସ୍କୃତି ଧୀରେ ଧୀରେ ଲୋପ ପାଇବାକୁ ବସିଥିବା ବେଳେ ଏଭଳି ମଞ୍ଚ କଳାକାରମାନଙ୍କୁ ନିଜ ପ୍ରତିଭା ପ୍ରଦର୍ଶନର ସୁଯୋଗ ଦେବା ସହ ଆଗାମୀ ପିଢ଼ିକୁ ନିଜ ସଂସ୍କୃତି ସହ ଯୋଡ଼ି ରଖିବାରେ ସହାୟକ ହେବ। ପର୍ଯ୍ୟଟନ ସହ ସ୍ଥାନୀୟ କଳା, ସଂସ୍କୃତି ଓ ପରମ୍ପରାକୁ ଯୋଡ଼ିବା ଦ୍ୱାରା ବାହାର ରାଜ୍ୟ ଓ ଦେଶ ବିଦେଶରୁ ଆସୁଥିବା ପର୍ଯ୍ୟଟକମାନେ କନ୍ଧମାଳର ଅସଲ ପରିଚୟ ଜାଣିବାର ସୁଯୋଗ ପାଇବେ। ଉଲ୍ଲେଖଯୋଗ୍ୟ ଯେ, ଦାରିଙ୍ଗବାଡ଼ି ଇକୋ ରିଟ୍ରିଟ୍ ପର୍ଯ୍ୟଟନ ସ୍ଥଳୀକୁ ବାଲିଗୁଡ଼ା ଉପଜିଲ୍ଲାପାଳ ପ୍ରଣୀତ ଦାସ ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ। ଏହି ଅବସରରେ ଦାରିଙ୍ଗବାଡ଼ି ବିଡିଓ କୃତିରଞ୍ଜନ ରଥ, ତହସିଲଦାର ଧୀରଜ ପାତ୍ର, ପୂର୍ବତନ ବାଚସ୍ପତି ସାଲୁଗା ପ୍ରଧାନଙ୍କ ସମେତ ପ୍ରଶାସନିକ ଅଧିକାରୀ, ପୋଲିସ କର୍ମଚାରୀ, ବୁଦ୍ଧିଜୀବୀ ଓ ବହୁ ସ୍ଥାନୀୟ ଲୋକ ଉପସ୍ଥିତ ଥିଲେ। ପ୍ରକୃତିର ସୌନ୍ଦର୍ଯ୍ୟ ସହ ଆଦିବାସୀ ସଂସ୍କୃତିର ଏହି ମନୋରମ ମିଳନ ଦାରିଙ୍ଗବାଡ଼ି ଇକୋ ରିଟ୍ରିଟ୍କୁ ଏକ ଭିନ୍ନ ପରିଚୟ ଦେଇଛି। ଏହା ଆଗାମୀ ଦିନରେ କନ୍ଧମାଳର ପର୍ଯ୍ୟଟନ ବିକାଶ ସହ ସ୍ଥାନୀୟ କଳାକାର ଓ ଲୋକସଂସ୍କୃତିର ପ୍ରଚାରପ୍ରସାରରେ ଏକ ନୂତନ ଅଧ୍ୟାୟ ଯୋଡ଼ିବ ବୋଲି ଆଶା କରାଯାଉଛି।






