ସର୍ଟକଟ୍ ଟଙ୍କାର ମାୟା- ଯୁବପିଢ଼ି ପଥଭ୍ରଷ୍ଟ

ଦୀପକ ସମାଦ୍ୱାର/ଟିଟିଲାଗଡ଼/ /ସମୀକ୍ଷା ନ୍ୟୁଜ:
ଆଜିକାଲିର ଯୁବପିଢ଼ିଙ୍କ ମଧ୍ୟରେ ଅଳ୍ପ ସମୟରେ ଅଧିକ ଧନୀ ହେବାର ନିଶା ଏକ ମାରାତ୍ମକ ରୂପ ଧାରଣ କରିଛି। ହାତ ପାହାନ୍ତାରେ ସ୍ମାର୍ଟଫୋନ୍ ଏବଂ ଡାଟା ଉପଲବ୍ଧ ହେବା ପରେ ଅନ୍ଲାଇନ୍ ଗେମିଂ ନାଁରେ ଚାଲିଥିବା ଜୁଆ ବା ବେଟିଂ ଏବେ ସମାଜ ପାଇଁ ଏକ ବଡ଼ କ୍ୟାନସର ସଦୃଶ ହୋଇଛି। କାମଧନ୍ଦା କରି ପରିଶ୍ରମର ସହ ରୋଜଗାର କରିବା ପରିବର୍ତ୍ତେ ମୋବାଇଲ୍ ସ୍କ୍ରିନ୍ରେ ଆଙ୍ଗୁଠି ଚିପି ଲକ୍ଷପତି ହେବାର ସ୍ୱପ୍ନ ଯୁବକମାନଙ୍କୁ ପଥଭ୍ରଷ୍ଟ କରୁଛି। ଯାହାର ପରିଣାମ ସ୍ୱରୂପ ବେକାରୀ ସମସ୍ୟା ବଢ଼ିବା ସହ ଅନେକ ପରିବାର ଆଜି ସର୍ବସାନ୍ତ ହେବାକୁ ବସିଛନ୍ତି। ବଜାରରେ ଉପଲବ୍ଧ ହେଉଥିବା ବିଭିନ୍ନ ବେଟିଂ ଆପ୍ଗୁଡ଼ିକ ଆକର୍ଷଣୀୟ ବିଜ୍ଞାପନ ଜରିଆରେ ଯୁବପିଢ଼ିଙ୍କୁ ଆକୃଷ୍ଟ କରୁଛନ୍ତି। ଥରେ ଖେଳିଲେ ଲକ୍ଷେ ଜିତିବେ ଭଳି ପ୍ରଲୋଭନରେ ପଡ଼ି ଯୁବକମାନେ ନିଜ ପାଖରେ ଥିବା ଅଳ୍ପ ବହୁତ ସଞ୍ଚୟକୁ ଏଥିରେ ହରାଉଛନ୍ତି। ଏହି ନିଶା ଏତେ ଭୟଙ୍କର ଯେ ଥରେ ହାରିଲେ ତାହାକୁ ଭରଣା କରିବା ଆଶାରେ ସେମାନେ ବାରମ୍ବାର ଖେଳୁଛନ୍ତି ଏବଂ ଶେଷରେ ଋଣ ଯନ୍ତାରେ ଫସି ଯାଉଛନ୍ତି।

ଏହି ସର୍ଟକଟ୍ ରୋଜଗାର ପନ୍ଥା ଯୋଗୁଁ ଯୁବପିଢ଼ିଙ୍କ ମଧ୍ୟରେ କର୍ମଠ ମନୋଭାବ କମିବାରେ ଲାଗିଛି। ଯେଉଁ ବୟସରେ ଯୁବକମାନେ କ୍ୟାରିୟର ଗଢ଼ିବା କଥା ସେହି ସମୟରେ ସେମାନେ ଅନ୍ଲାଇନ୍ ଜୁଆରେ ସମୟ ନଷ୍ଟ କରୁଛନ୍ତି। ଶାରୀରିକ ବା ମାନସିକ ପରିଶ୍ରମ କରି କାମ କରିବାକୁ ସେମାନେ ବିମୁଖ ହେଉଛନ୍ତି। ଯେତେବେଳେ ଜୁଆ ଖେଳିବା ପାଇଁ ଟଙ୍କା ସରିଯାଉଛି ସେତେବେଳେ ସେମାନେ ଚୋରି,ଡକାୟତି କିମ୍ବା ପରିବାର ଲୋକଙ୍କୁ ମାନସିକ ନିର୍ଯାତନା ଦେବାକୁ ପଛାଉ ନାହାନ୍ତି। ଏହା କେବଳ ବ୍ୟକ୍ତିଗତ କ୍ଷତି କରୁନାହିଁ ବରଂ ଦେଶର ଅର୍ଥନୀତି ଓ ସାମାଜିକ ଶୃଙ୍ଖଳା ଉପରେ ମଧ୍ୟ କୁପ୍ରଭାବ ପକାଉଛି। ଅନେକ କ୍ଷେତ୍ରରେ ଦେଖାଯାଇଛି ଯେ ନିମ୍ନ ମଧ୍ୟବିତ୍ତ ପରିବାରର ପିଲାମାନେ ନିଜ ପାଠପଢ଼ା ଖର୍ଚ୍ଚ କିମ୍ବା ଘରର ଅତି ଦରକାରୀ ଟଙ୍କାକୁ ଏହି ଖେଳରେ ଲଗାଇ ଦେଉଛନ୍ତି। ହାରିଯିବା ପରେ ମାନସିକ ଚାପ ସହ୍ୟ ନକରିପାରି କିଛି ଯୁବକ ଆତ୍ମହତ୍ୟା ଭଳି ଚରମ ପଦକ୍ଷେପ ମଧ୍ୟ ଗ୍ରହଣ କରୁଛନ୍ତି।ତାହାର ଉଦାହରଣ ମଧ୍ୟ ଦେଖିବାକୁ ମିଳୁଛି l କିଛି ସଚେତନ ଲୋକଙ୍କ ମତରେ ଅନ୍ଲାଇନ୍ ଜୁଆ ଏକ ମାନସିକ ରୋଗ ପରି ବ୍ୟାପୁଛି। ଯଦି ସରକାର ଏହି ଆପ୍ଗୁଡ଼ିକ ଉପରେ କଡ଼ା କଟକଣା ନଲଗାନ୍ତି ଏବଂ ଅଭିଭାବକମାନେ ସଚେତନ ନହୁଅନ୍ତି ତେବେ ଆଗାମୀ ଦିନରେ ଏକ କର୍ମକୁଢ଼ୁଆ ଓ ମାନସିକ ସ୍ତରରେ ଦୁର୍ବଳ ପିଢ଼ି ସୃଷ୍ଟି ହେବ ନିଶ୍ଚିତ l






