ଭବାନୀ ଶଙ୍କର ମିଶ୍ର/ବରିଷ୍ଠ ସାମ୍ବାଦିକ /ମୟୂରଭଞ୍ଜ /ସମୀକ୍ଷା ନ୍ୟୁଜ:
ବଡ଼ସାହି, ୯/୧୧/୨୬ -ମୟୂରଭଞ୍ଜ ଜିଲ୍ଲାରେ ଦୁଷ୍କର୍ମ ଖବର ନେଇ ଅଞ୍ଚଳର ଏକ ଆଶ୍ରମ ବିଦ୍ୟାଳୟର ନାବାଳିକା ଛାତ୍ରୀ ୭ମାସ ଗର୍ଭବତୀ ହେବା ସହ ନବଜାତକର ମୃତ୍ୟୁ ଘଟଣା ଜିଲ୍ଲାରେ ଭାଇରାଲ ହୋଇଥିବା ବେଳେ ପୁଣି ଏକ ଦୁଃଖଦ ଓ ଲଜ୍ଜାଜନକ ଘଟଣା ଘଟିଥିବା ଜଣାପଡିଛି । ଏସଟିଏସସି ଉନ୍ନୟନ ବିଭାଗ ପରିଚାଳିତ ଏକ ଆଶ୍ରମ ବିଦ୍ୟାଳୟରେ ଅଧ୍ୟୟନରତ ଆଉଜଣେ ନାବାଳିକା ଛାତ୍ରୀ ଦୁଷ୍କର୍ମର ଶିକାର ହୋଇ ୩ ମାସର ଗର୍ଭବତୀ ହେବା ଘଟଣା ରାସଗୋବିନ୍ଦପୁର ଅଞ୍ଚଳରେ ଘଟିଯାଇଛି । ସୂଚନା ଅନୁଯାୟୀ, ଜୈନିକା ନାବାଳିକା ଉକ୍ତ ଥାନା ଅଧୀନ ଆଶ୍ରମ ବିଦ୍ୟାଳୟରେ ରହି ଅଷ୍ଟମ ଶ୍ରେଣୀରେ ପାଠ ପଢୁଥିଲେ । ଗତ ଅଗଷ୍ଟ ମାସରେ ଉକ୍ତ ନାବାଳିକା ଜଣକ ଛୁଟିରେ ଘରକୁ ଯାଇ ଏକ କୁକୁଡ଼ା ଫାର୍ମରେ କାମ କରିଥିଲେ । ବିଦ୍ୟାଳୟ ଖୋଲିବା ପରେ ସେ ପୁନର୍ବାର ଛାତ୍ରୀନିବାସକୁ ଫେରି ପାଠପଢ଼ା ଜାରି ରଖିଥିଲେ । ଅଭିଯୋଗ ଅନୁଯାୟୀ ଉକ୍ତ କୁକୁଡ଼ା ଫାର୍ମର ଜଣେ ୫୧ ବର୍ଷୀୟ ବ୍ୟକ୍ତି ଉକ୍ତ ନାବାଳିକାଙ୍କୁ ଜବରଦସ୍ତି ବଳାତ୍କାର କରିଥିଲେ ଏବଂ କାହାକୁ ଏକଥା ନଜଣାଇବାକୁ ଧମକ ମଧ୍ୟ ଦେଇଥିଲେ । ଶନିବାର ଦିନ ନାବାଳିକା ଜଣକ ହଠାତ ଅସୁସ୍ଥ ହେବା ପରେ ବିଦ୍ୟାଳୟର ପ୍ରଧାନ ଶିକ୍ଷକ ପରିବାର ଲୋକଙ୍କୁ ଖବର ଦେବା ପରେ ପରିବାର ଲୋକେ ତାଙ୍କୁ ରାସଗୋବିନ୍ଦପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ ।

ଡାକ୍ତରୀ ପରୀକ୍ଷା ପରେ ନାବାଳିକା ଜଣକ ୩ ମାସର ଗର୍ଭବତୀ ଥିବା ଜଣା ପଡ଼ିବା ପରେ ନାବାଳିକା ଜଣକ ଘଟଣା ବାବଦରେ ପରିବାର ଲୋକଙ୍କୁ କହିଥିଲେ । ଏହାପରେ ବିଧବା ମା’ ପଚରାଉଚରା କରିବାରୁ ଝିଅ ସବୁକଥା କହିଥିଲେ । ଘଟଣାକୁ ନେଇ ଅଭିଯୁକ୍ତ ଛାତ୍ରୀଙ୍କୁ ପ୍ରକାଶ କଲେ ଜୀବନ ପ୍ରତି ବିପଦ ହେବ ବୋଲି ମଧ୍ୟ ଛାତ୍ରୀଙ୍କୁ ଧମକ ଦେଇଥିଲେ । ଏନେଇ ରାସଗୋବିନ୍ଦପୁର ଥାନାରେ ନାବାଳିକାଙ୍କ ମା ଲିଖିତ ଅଭିଯୋଗ କରିବା ପରେ ୫୮୫/୨୬ରେ ଏକ ମାମଲା ରୁଜୁ ପୂର୍ବକ ପୁଲିସ ସମ୍ପୃକ୍ତ ୫୧ ବର୍ଷୀୟ ବ୍ୟକ୍ତିଙ୍କୁ ଅଟକ ରଖି ତଦନ୍ତ ଜାରି ରଖିଥିବା ଜଣାପଡିଛି । ତେବେ ମୁଣ୍ଡ ଭିତରୁ ଗୋଟିଏ ଆଶ୍ରମ ବିଦ୍ୟାଳୟର ଘଟଣା ନଯାଉଣୁ ପୁଣି ଅନ୍ୟଏକ ଘଟଣା ନେଇ ଛାତ୍ରୀଙ୍କ ସୁରକ୍ଷା, ନିରୀକ୍ଷଣ ବ୍ୟବସ୍ଥା ଓ ଅନ୍ୟାନ୍ୟ ଆବଶ୍ୟକୀୟ ନିୟମର କଡାକଡି କାର୍ଯ୍ୟକାରିତାକୁ ନେଇ ଏବେ ଅଞ୍ଚଳ ଓ ଜିଲ୍ଲାରେ ଆଲୋଡନ ସୃଷ୍ଟି ହୋଇଛି । ଶିକ୍ଷାନୁଷ୍ଠାନର ଏଭଳି ନୀନ୍ଦନୀୟ ଘଟଣାକୁ ବ୍ୟାପକ ଚର୍ଚ୍ଚା ଚାଲିଥିବା ବେଳେ ଅବିଭାବକ ଗଣ ମାନସିକ ଚିନ୍ତା କବଳରେ ରହିଥିବା ଜାଣିବାକୁ ମିଳିଛି ।





