ଅବିନାଶ ଗଡତିଆ/ବରଗଡ /ସମୀକ୍ଷା ନ୍ୟୁଜ :
:ବରଗଡ଼ରେ ମହାଳୟା ଅବସରରେ ମାଁ ସମଲେଇଙ୍କ ଆକର୍ଷଣୀୟ ‘ଧବଳମୁଖୀ ବେଶ’. ବରଗଡ଼ ସହରର ଅଧିଷ୍ଠାତ୍ରୀ ଗ୍ରାମ୍ୟଦେବୀ ଭଗବତୀ ମାଁ ସମଲେଇଙ୍କ ପୀଠରେ ପବିତ୍ର ମହାଳୟା ତିଥି ଅବସରରେ ଏହି ବାର୍ଷିକ ସ୍ୱତନ୍ତ୍ର ରୀତିନୀତି ଅନୁଷ୍ଠିତ ହୋଇଯାଇଛି. ବର୍ଷସାରା ଦେବୀଙ୍କୁ ସିନ୍ଦୂରବର୍ଣ୍ଣା ରକ୍ତମୁଖୀ ରୂପରେ ପୂଜା କରାଯାଉଥିବା ବେଳେ ବର୍ଷକରେ ମାତ୍ର ଥରେ ମାଆଙ୍କୁ ଏହି ଅଲୌକିକ ଶ୍ୱେତ ରୂପରେ ସଜ୍ଜିତ କରାଯାଏ। ଏହି ଦୁର୍ଲଭ ଧବଳମୁଖୀ ବେଶକୁ ସ୍ଥାନୀୟ ଅଞ୍ଚଳରେ ‘ଗଙ୍ଗା ଦର୍ଶନ ବେଶ’ ବୋଲି ମଧ୍ୟ ବିଶ୍ୱାସ କରାଯାଏ. ପିତୃପକ୍ଷର ଶେଷ ଦିନ ଅର୍ଥାତ୍ ମହାଳୟା ଅମାବାସ୍ୟାରେ ଯେଉଁ ଶ୍ରଦ୍ଧାଳୁମାନେ ଗଙ୍ଗା ନଦୀରେ ସ୍ନାନ କିମ୍ବା ତର୍ପଣ କରିବାକୁ ଅସମର୍ଥ ହୁଅନ୍ତି, ସେମାନେ ମାଆଙ୍କ ଏହି ଶ୍ୱେତ ରୂପ ଦର୍ଶନ କଲେ ସମାନ ପୁଣ୍ୟଫଳ ପ୍ରାପ୍ତି ହୁଏ ବୋଲି ପ୍ରବଳ ଜନବିଶ୍ୱାସ ରହିଛି. ଏହି ଦର୍ଶନ ପାଇଁ ବରଗଡ଼ ସହର ତଥା ଆଖପାଖ ଅଞ୍ଚଳରୁ ହଜାର ହଜାର ଭକ୍ତ ମନ୍ଦିରରେ ଭିଡ଼ ଜମିଥାଏ।
ମହାଳୟା ପୂର୍ବ ରାତିରୁ ମାଆଙ୍କର ଗୁପ୍ତ ରୀତିନୀତି ଏବଂ ମୁଖମଣ୍ଡଳରେ ସ୍ୱତନ୍ତ୍ର ପ୍ରଲେପ ଲଗାଇବା କାର୍ଯ୍ୟ ଆରମ୍ଭ ହୋଇଥିଲା. ଶନିବାର ସକାଳୁ ମାଆ ସମ୍ପୂର୍ଣ୍ଣ ଶ୍ୱେତ ବସ୍ତ୍ର, ଶ୍ୱେତ ଅଳଙ୍କାର ଓ ଧଳା ଫୁଲରେ ଭୂଷିତ ହୋଇ ଭକ୍ତଙ୍କୁ ଦର୍ଶନ ଦେଇଛନ୍ତି. ମାଆଙ୍କ ପବିତ୍ର ଆଳତି ସମୟରେ ପୂଜକ ଓ ସେବାୟତମାନେ ମଧ୍ୟ ପାରମ୍ପରିକ ଶୈଳୀରେ ଧଳା ରଙ୍ଗର ବସ୍ତ୍ର ପରିଧାନ କରି ପୂଜାର୍ଚ୍ଚନା କରିଥିଲେ. ମାଆଙ୍କ ଏହି ଶାନ୍ତ ଓ ମାତୃ ରୂପ ଭକ୍ତମାନଙ୍କୁ ଭାବବିହ୍ୱଳ କରିଛି।ମନ୍ଦିର ପ୍ରଶାସନ ସୂଚନା ଅନୁଯାୟୀ, ମାଆ ସମଲେଇ ଶ୍ରଦ୍ଧାଳୁଙ୍କୁ ପ୍ରାୟ ଅଢ଼େଇ ଦିନ ପର୍ଯ୍ୟନ୍ତ ଏହି ଧବଳମୁଖୀ ବେଶରେ ଦର୍ଶନ ଦେବେ। ଏହି ବିଶେଷ ଦିନଗୁଡ଼ିକରେ ଶ୍ରଦ୍ଧାଳୁମାନେ ଯେପରି ଶୃଙ୍ଖଳିତ ଭାବେ ଦର୍ଶନ କରିପାରିବେ, ସେଥିପାଇଁ ମନ୍ଦିର ପରିସରରେ ସୁରକ୍ଷା ବ୍ୟବସ୍ଥାକୁ ମଧ୍ୟ କଡ଼ାକଡ଼ି କରାଯାଇଛି. ଏହି ଧବଳମୁଖୀ ବେଶ ସମାପ୍ତ ହେବା ପରେ ମାଆଙ୍କ ପୀଠରେ ଶାରଦୀୟ ନବରାତ୍ରି ଓ ଦୁର୍ଗାପୂଜା ଉତ୍ସବର ଶୁଭାରମ୍ଭ ହେବ।
