ଭବାନୀ ଶଙ୍କର ମିଶ୍ର/ବରିଷ୍ଠ ସାମ୍ବାଦିକ /ମୟୂରଭଞ୍ଜ /ସମୀକ୍ଷା ନ୍ୟୁଜ:
ବଡ଼ସାହି, ୧୨/୧୧/୨୬ – ନଭେମ୍ବର ୧୪ ତାରିଖରେ ହେବାକୁ ଥିବା କୋଟିଏ ହସ କାର୍ଯ୍ୟକ୍ରମ ପୂର୍ବରୁ ମୟୂରଭଞ୍ଜ ଜିଲ୍ଲାର ଅଙ୍ଗନୱାଡ଼ି କର୍ମୀଙ୍କ ମଧ୍ୟରେ ଅସନ୍ତୋଷ ପ୍ରକଟ ହୋଇଛି । ପିଲାଙ୍କ ପାଇଁ ନିଜସ୍ୱ ଖର୍ଚ୍ଚରେ ସ୍ବେଟର ଓ ଜୋତା କିଣିଥିଲେ ମଧ୍ୟ ଏଯାଏଁ ଏ ବାବଦ ଅର୍ଥ ବ୍ୟାଙ୍କ ପାସବୁକରେ ଜମା ହୋଇନାହିଁ ବୋଲି ଗୁରୁତର ଅଭିଯୋଗ ହୋଇଥିବା ଜଣାପଡିଛି । ଏହାର ପ୍ରତିବାଦ ସ୍ୱରୂପ ଅଲ ଓଡ଼ିଶା ଅଙ୍ଗନୱାଡ଼ି କର୍ମୀ ଓ ସହାୟିକା ସଂଘ, ମୟୂରଭଞ୍ଜ ଶାଖା ପକ୍ଷରୁ ଜିଲ୍ଲାପାଳଙ୍କୁ ସ୍ମାରକପତ୍ର ପ୍ରଦାନ କରାଯାଇଛି । ସଂଘର ଜିଲ୍ଲା ସଭାନେତ୍ରୀ ସୌଭାଗ୍ୟ ମଞ୍ଜରୀ କରଣଙ୍କ କହିବା ଅନୁଯାୟୀ, ପ୍ରତିବର୍ଷ କାର୍ଯ୍ୟକ୍ରମ ପୂର୍ବରୁ ସ୍ବେଟର କିଣିବା ପାଇଁ ଅର୍ଥ ମିଳୁଥିବା ବେଳେ ଚଳିତ ବର୍ଷ ଏଯାଏଁ ସେ ଟଙ୍କା ମିଳିନାହିଁ । ଫଳରେ କର୍ମୀମାନେ କିଣିବାକୁ ନିଜ ପକେଟରୁ ଖର୍ଚ୍ଚ କରିଛନ୍ତି । ତେଣୁ ସିଡିପିଓଙ୍କ ମାଧ୍ୟମରେ ତୁରନ୍ତ ସ୍ୱିଟର ଓ ଜୋତା କିଣା ବାବଦ ଅର୍ଥ ପାସବୁକରେ ଜମା କରିବାକୁ ସଂଘ ଦାବି କରିଛି । ଆୟୋଜିତ ପ୍ରତିବାଦ ଏବଂ ଦାବିପତ୍ର ପ୍ରଦାନ କାର୍ଯ୍ୟକ୍ରମରେ ଜିଲ୍ଲାର ବିଭିନ୍ନ ଅଞ୍ଚଳରୁ ଶତାଧିକ ଅଙ୍ଗନୱାଡି କର୍ମୀ ଯୋଗ ଦେଇଥିଲେ ।






