ଭବାନୀ ଶଙ୍କର ମିଶ୍ର/ବରିଷ୍ଠ ସାମ୍ବାଦିକ /ମୟୂରଭଞ୍ଜ /ସମୀକ୍ଷା ନ୍ୟୁଜ:
କପ୍ତିପଦା, ୧୪/୧୧/୨୬ – କପ୍ତିପଦା ବ୍ଲକର ଘୋଡ଼ାଗାଧୁଆ ନାମଟି ଅନାଲୋଚିତ ସହିତ ଲୋକେ ଆଦୌ ପରିଚିତ ନୁହଁନ୍ତି । ମାତ୍ର କପ୍ତିପଦା ବ୍ଲକର ଏହା ଏକ ବହୁ ପୁରାତନ ଗ୍ରାମ । ବର୍ତ୍ତମାନ ଏହି ଗ୍ରାମଟି ପଦ୍ମପୋଖରୀ ପଂଚାୟତ ଅଧିନରେ ରହିଛି । ପ୍ରାକୃତିକ ସୌନ୍ଦର୍ଯ୍ୟରେ ଭରପୁର ଏହି ଗ୍ରାମଟି ଅଦ୍ୟାବଧି ପ୍ରକୃତି ବା ପରିବେଶ ପ୍ରେମୀଙ୍କ ନଜରରେ ମଧ୍ୟ ପଡ଼ିନାହିଁ । ତେଣୁ ପର୍ଯ୍ୟଟନ ରୁତୁରେ ଏଠାକୁ ଲୋକେ ବଣଭୋଜି କରିବାକୁ ଆସନ୍ତି ନାହିଁ । ମତ ଅନୁସାରେ ଇଂରେଜ ସରକାରଙ୍କ ରାଜତ୍ୱକାଳରେ କପ୍ତିପଦାରେ ରାଜା ଶାସନ ଚାଲିଥିଲା । ରାଜାଙ୍କ ନିର୍ଦ୍ଦେଶରେ ଏଠାରେ ଘୋଡ଼ାଶାଳ ଖୋଲାଯିବା ସହ କିଛି ଲୋକଙ୍କୁ ଶାଳର ରକ୍ଷଣାବେକ୍ଷଣ ପାଇଁ ନିଯୁକ୍ତି ମିଳିଥିଲା । ଉକ୍ତ ଘୋଡ଼ାଶାଳ ନିକଟ ଦେଇ ପ୍ରବାହିତ ଝରଣାରେ ନିଯୁକ୍ତି ପାଇଥିବା କର୍ମଚାରୀ ମାନେ ଘୋଡ଼ା ମାନଙ୍କୁ ଗାଧୋଇବାକୁ ନେଉଥିଲେ । ସେବେଠାରୁ ଏହି ଗ୍ରାମଟି ଘୋଡ଼ାଗାଧୁଆ ନାମରେ ପରିଚିତ । ସେଠି ଏବେ ଆଉ ଘୋଡ଼ା ନାହାଁନ୍ତି କି ଶାଳମଧ୍ୟ ନାହିଁ ।

କିନ୍ତୁ ପୁରୁଷାନୁକ୍ରମେ ଏଠାରେ ନିଯୁକ୍ତି ପାଇଥିବା ରାଜକର୍ମଚାରୀ ମାନେ ବସବାସ କରିଆସୁଛନ୍ତି । ଏହି ରାଜ କର୍ମଚାରୀ ମାନଙ୍କ ମଧ୍ୟରୁ ଅଧିକାଂଶ ଏବେ ମଧ୍ୟ ଜମି ପଟ୍ଟା ପାଇନାହାଁନ୍ତି । ଫଳରେ ଆବାସ ଯୋଜନାରେ ଘର, ବାସିନ୍ଦା ପ୍ରମାଣପତ୍ର, ଜାତି ପ୍ରମାଣପତ୍ର ଇତ୍ୟାଦି ନପାଇ ଗ୍ରାମବାସୀ ନାହିଁନଥିବା ଅସୁବିଧାର ସମ୍ମୁଖିନ ହେଉଛନ୍ତି । ସେହିପରି ଯାତାୟତ ପାଇଁ ରାସ୍ତା ଠିକ୍ ନଥିବାରୁ ପ୍ରାୟ ୫ କିମି ରାସ୍ତା ପାଦରେ ଚାଲିଚାଲି ଯିବାକୁ ପଡ଼ୁଛି । ଦୈନନ୍ଦିନର ଗୁଜୁରାଣ ମେଂଟାଇବା ପାଇଁ କୌଣସି କାମଧନ୍ଦା ମିଳୁନଥିବାରୁ ଏହି ଗ୍ରାମର ଲୋକେ ବାଧ୍ୟ ହୋଇ ଦାଦନ ଖଟିବାକୂୁ ବାହାରକୁ ଯାଉଛନ୍ତି । ରାଜ୍ୟ ସରକାର ଏହି ଗ୍ରାମବାସୀଙ୍କର ଦୁଃଖ ଓ ସମସ୍ୟା ବୁଝି ତୁରନ୍ତ ଆବଶ୍ୟକ ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ଜନଜାଗୃତି ମଂଚର ସ୍ୱେଛାସେବୀ ମାନେ ଅନୁରୋଧ ଜଣାଇଛନ୍ତି ।





