ବିଜୟ ରତ୍ନ ପତି/ସ୍ୱତନ୍ତ୍ର ପ୍ରତିନିଧି/ସମୀକ୍ଷା ନିୟୁଜ୍/ କେନ୍ଦୁଝର:
ପାଟଣା:୭/୧୧,ଆଉ ମାତ୍ର ଗୋଟିଏ ଦିନ ପରେ ଧରାବତରଣ କରିବେ ମା’ ଦକ୍ଷିଣକାଳୀ। ଆଲୋକର ପର୍ବ କାଳୀପୂଜା ଓ ଦୀପାବଳିକୁ ଆନନ୍ଦ ଉଲ୍ଲାସର ସହ ପାଳନ କରିବା ପାଇଁ ଏବେ ଚଳଚଞ୍ଚଳ ହୋଇଉଠିଛି କେନ୍ଦୁଝର ଜିଲ୍ଲାର ପାଟଣା ଅଞ୍ଚଳ। ପୂଜାକୁ ନେଇ ସ୍ଥାନୀୟ ବଜାରରେ କିଣାକିଣି ଜୋରଦାର ହୋଇଥିବା ବେଳେ ବାଣ ବଜାରରେ ଗ୍ରାହକଙ୍କ ଭିଡ଼ ଜମିବାରେ ଲାଗିଛି।ଏହି ଅବସରରେ ପାଟଣା ବଜାର ନିକଟସ୍ଥ ମିନି ଷ୍ଟାଡିୟମ ପରିସରରେ ବିଭିନ୍ନ ବାଣ ଦୋକାନ ଖୋଲିଛି। ବାଣ କିଣିବା ପାଇଁ ଗ୍ରାହକମାନେ ଏଠାରେ ଭିଡ଼ ଜମାଉଛନ୍ତି। ବିଭିନ୍ନ ପ୍ରକାରର ରଙ୍ଗବେରଙ୍ଗର ବାଣ ସହ ତାଳଫୁଟୁକା, ଝିରିଝିରି, ଆକାଶବାଣ, କଚାବାଣ ଓ ଫୁଲଝରି ଆଦିର ଚାହିଦା ରହିଛି। ଦୋକାନଗୁଡ଼ିକରେ ବାଣ କିଣାବିକା ଜୋରସୋରରେ ଚାଲିଛି।ସେହିପରି କାଳୀପୂଜା ଓ ଦୀପାବଳି ପାଇଁ ନୂତନ ବସ୍ତ୍ର କିଣିବାକୁ ବସ୍ତ୍ର ଦୋକାନଗୁଡ଼ିକରେ ମଧ୍ୟ ଗ୍ରାହକଙ୍କ ଭିଡ଼ ଲାଗି ରହିଛି। ଏଥିସହ ମିଠା ଦୋକାନ ଓ ପୂଜା ସାମଗ୍ରୀ ଦୋକାନରେ ମଧ୍ୟ ବେଶ୍ ବ୍ୟବସାୟ ଜମିଛି। ମୋଟାମୋଟି ଭାବେ କାଳୀପୂଜା ଓ ଦୀପାବଳିକୁ ନେଇ ପାଟଣା ଅଞ୍ଚଳରେ ଉତ୍ସବମୁଖର ପରିବେଶ ସୃଷ୍ଟି ହୋଇଛି। ତେବେ ବାଣ କିଣିବା ଓ ବ୍ୟବହାର କରିବା ସମୟରେ ସରକାରୀ ନିୟମ ମାନିବା ସହ ସୁରକ୍ଷା ପ୍ରତି ଧ୍ୟାନ ଦେବାକୁ ସଚେତନ ମହଲରେ ମତ ପ୍ରକାଶ ପାଇଛି।






