ହିମାଂଶୁ ଭୂଷଣ ନାୟକ/ସାମ୍ବାଦିକ /ପାରାଦୀପ/ ସମୀକ୍ଷା ନ୍ୟୁଜ:
ଶିଳ୍ପକୁ ନେଇ ଚର୍ଚ୍ଚାରେ ରହୁଥିବା ଜଗତସିଂହପୁର ଜିଲ୍ଲାର ଢିଙ୍କିଆ ଏବେ ଦେଉଛି ଭାଇଚାରା, ଶାନ୍ତି ଓ ମାନବିକତାର ବାର୍ତ୍ତା। ରକ୍ତଦାନ ଭଳି ମହତ୍ କାର୍ଯ୍ୟ ମାଧ୍ୟମରେ ଏକତାର ନୂଆ ପରିଚୟ ସୃଷ୍ଟି କରିଛି ଢିଙ୍କିଆ। ନେତାଜୀ ଯୁବକ ସଂଘ, ଢିଙ୍କିଆ ପକ୍ଷରୁ ଢିଙ୍କିଆ ମେଡିକାଲ ପରିସରରେ ଆୟୋଜିତ ହୋଇଛି ଏକ ବିଶାଳ ରକ୍ତଦାନ ଶିବିର। ରକ୍ତଦାନ ମାଧ୍ୟମରେ ଅମୂଲ୍ୟ ଜୀବନ ବଞ୍ଚାଇବା ସହ ଅଞ୍ଚଳରେ ଭାଇଚାରା ଓ ଶାନ୍ତିର ବାତାବରଣକୁ ଆହୁରି ସୁଦୃଢ଼ କରିବା ଏହି ଶିବିରର ମୁଖ୍ୟ ଉଦ୍ଦେଶ୍ୟ। ଆସନ୍ତୁ ଦେଖିବା ଏହି ରିପୋର୍ଟ। ରକ୍ତଦାନ ମହତ୍ ଦାନ, ଆଉ ଗୋଟିଏ ୟୁନିଟ୍ ରକ୍ତ ବଞ୍ଚାଇପାରେ ଜଣେ ମଣିଷର ଅମୂଲ୍ୟ ଜୀବନ। ଏହି ମହତ୍ ଉଦ୍ଦେଶ୍ୟକୁ ନେଇ ଜଗତସିଂହପୁର ଜିଲ୍ଲା ଢିଙ୍କିଆ ପଞ୍ଚାୟତରେ ଆୟୋଜିତ ହୋଇଛି ବିଶାଳ ରକ୍ତଦାନ ଶିବିର। ଢିଙ୍କିଆ ମେଡିକାଲ ପରିସରରେ ନେତାଜୀ ଯୁବକ ସଂଘ ପକ୍ଷରୁ ଆୟୋଜିତ ଏହି ଶିବିରରେ ସାମିଲ ହୋଇଛନ୍ତି ରକ୍ତଦାତା ଓ ସଂଘର ସଦସ୍ୟମାନେ।

ରକ୍ତଦାନ ଭଳି ମହତ୍ କାର୍ଯ୍ୟ ମାଧ୍ୟମରେ ମାନବିକତାର ପରିଚୟ ଦେବା ସହ ଅଞ୍ଚଳରେ ଏକତା ଓ ଭାଇଚାରାର ବାର୍ତ୍ତା ପହଞ୍ଚାଇବାକୁ ଉଦ୍ୟମ କରିଛି ଏହି ଯୁବକ ସଂଘ। ଶିଳ୍ପକୁ ନେଇ ଦୀର୍ଘଦିନ ଧରି ଚର୍ଚ୍ଚାରେ ରହିଆସିଛି ଢିଙ୍କିଆ ଅଞ୍ଚଳ। ଶିଳ୍ପ ସପକ୍ଷବାଦୀ ଓ ବିରୋଧୀଙ୍କୁ ନେଇ ବିଭିନ୍ନ ସମୟରେ ଚର୍ଚ୍ଚା ହେଉଥିବା ଏହି ଅଞ୍ଚଳ ଏବେ ରକ୍ତଦାନ ଶିବିର ମାଧ୍ୟମରେ ଦେଇଛି ଏକ ସକାରାତ୍ମକ ବାର୍ତ୍ତା। ମତପାର୍ଥକ୍ୟ ଯାହା ଥାଉ ନା କାହିଁକି, ମାନବିକତା ଓ ଜନକଲ୍ୟାଣ କ୍ଷେତ୍ରରେ ସମସ୍ତେ ଏକାଠି ହୋଇପାରିବେ, ଏହି ବାର୍ତ୍ତା ଦେଇଛି ଏହି ଶିବିର।ଢିଙ୍କିଆ ଅଞ୍ଚଳ ସବୁବେଳେ ଶାନ୍ତି ଚାହେଁ। ଆଗାମୀ ଦିନରେ ମଧ୍ୟ ଅଞ୍ଚଳରେ ଶାନ୍ତି ଓ ସଦ୍ଭାବନା ବଜାୟ ରଖିବା ଦିଗରେ ଏହି ରକ୍ତଦାନ ଶିବିର ଏକ ଛୋଟ ପ୍ରୟାସ ବୋଲି କହିଛନ୍ତି ନେତାଜୀ ଯୁବକ ସଂଘର ସଭାପତି ସରୋଜ ରାଉତ।ସହରାଞ୍ଚଳରେ ଅନେକ ସମୟରେ ରକ୍ତଦାନ ଶିବିର ଆୟୋଜନ ହେଉଥିବା ବେଳେ ଗ୍ରାମାଞ୍ଚଳରେ ମଧ୍ୟ ଏଭଳି ଶିବିର ଆୟୋଜନ କରି ଅଧିକରୁ ଅଧିକ ରକ୍ତ ସଂଗ୍ରହ କରିବା ଏବଂ ଜରୁରୀ ସମୟରେ ରୋଗୀଙ୍କୁ ରକ୍ତ ଯୋଗାଇବାରେ ସହାୟତା କରିବା ହେଉଛି ଏହି ପଦକ୍ଷେପର ମୁଖ୍ୟ ଲକ୍ଷ୍ୟ। ଗତ ତିନି ବର୍ଷ ଧରି ନେତାଜୀ ଯୁବକ ସଂଘ ଏଭଳି ରକ୍ତଦାନ ଶିବିର ଆୟୋଜନ କରିଆସୁଛି। ଚଳିତ ବର୍ଷ ଶିବିରରେ ୧୨୦ ୟୁନିଟ୍ ରକ୍ତ ସଂଗ୍ରହ କରିବାକୁ ଲକ୍ଷ୍ୟ ରଖିଛି ସଂଘ। ଏହି ମହତ୍ କାର୍ଯ୍ୟରେ ସଂଘର ସମସ୍ତ ସଦସ୍ୟ ସହଯୋଗ କରିଛନ୍ତି। ରକ୍ତଦାନ କେବଳ ଜଣେ ମଣିଷର ଜୀବନ ବଞ୍ଚାଏ ନାହିଁ, ବରଂ ସମାଜରେ ମାନବିକତା, ଏକତା ଓ ଭାଇଚାରାକୁ ମଧ୍ୟ ମଜଭୁତ କରେ। ଢିଙ୍କିଆରେ ନେତାଜୀ ଯୁବକ ସଂଘର ଏହି ପ୍ରୟାସ ଅନ୍ୟ ଗ୍ରାମାଞ୍ଚଳ ପାଇଁ ମଧ୍ୟ ଏକ ପ୍ରେରଣା ସାଜିବ





