ଭବାନୀ ଶଙ୍କର ମିଶ୍ର/ବରିଷ୍ଠ ସାମ୍ବାଦିକ /ମୟୂରଭଞ୍ଜ /ସମୀକ୍ଷା ନ୍ୟୁଜ:
ବଡ଼ସାହି, ୧୨/୧୧/୨୬ – ଏକ ନୂତନ ଇତିହାସ ଗଢିବାକୁ ଯାଉଥିବା ଲକ୍ଷ୍ୟରେ ମୟୂରଭଞ୍ଜ ଜିଲ୍ଲା ବଡ଼ସାହି ବ୍ଲକ ଦୁର୍ଗାପୁର ପଞ୍ଚାୟତ ଅନ୍ତର୍ଗତ ଆଗୁଆଡ଼ ଗ୍ରାମରେ ଆଦିବାସୀ କୁଡୁମୀ ସମାଜ ପକ୍ଷରୁ ଆୟୋଜିତ ତିନିଦିନିଆ ଜାତୀୟ ବାନ୍ଦନା ପରବ-୨୦୨୬ ଦ୍ୱିତୀୟ ଦିନରେ ଉତ୍ସବମୁଖର ହୋଇଉଠିଛି । ଏହି ଅବସରରେ ଆସାମ ସମେତ ବିଭିନ୍ନ ରାଜ୍ୟରୁ କୁଡୁମୀ ସମାଜର ପ୍ରତିନିଧିମାନେ ପହଞ୍ଚିଥିବା ବେଳେ ବ୍ୟାପକ ଜନ ସମାଗମରେ ପରବ ପରିସର ଚଳଚଞ୍ଚଳ ହୋଇପଡ଼ିଥିଲା । ପରବ ଅବସରରେ କୁଡୁମାଲୀ ସଂସ୍କୃତିର ପାରମ୍ପରିକ ପିଠାପଣା ଷ୍ଟଲ ଖୋଲାଯାଇଛି । ଲୋକଙ୍କ ପସନ୍ଦ ସହ ଭଲ ବ୍ୟବସାୟ ମଧ୍ୟ ହେଉଅଛି ବୋଲି ବହୁ ମତ ମିଳିଥିଲା । ଏହା ସହିତ କୁଡୁମୀ ସଂସ୍କୃତିର ଅନନ୍ୟ ପରିଚୟ ଝୁମର ନୃତ୍ୟ ସେମିନାର ଆୟୋଜିତ ହୋଇଥିଲା । ଶହ ଶହ ମହିଳା ଏକତ୍ରିତ ହୋଇ ଗୋଟିଏ ଗୀତ ଓ ମାଦଳ ତାଳରେ ଝୁମର ନୃତ୍ୟ ପରିବେଷଣ କରି ଦର୍ଶକଙ୍କ ମନ ମୋହିବା ସହିତ ଏକତାର ବାର୍ତ୍ତା ବାଣ୍ଟିବା ଭଳି ଅନୁଭବ ହେବା ସହ ଉତ୍ସବ ପଡିଆ ଦୁଲୁକି ଯାଉଛି ।

ଏହି ଅବସରରେ ଆୟୋଜିତ ଅତିଥି ସମାବେଶରେ ମୁଖ୍ୟ ଅତିଥି ଭାବେ ଝାଡ଼ଖଣ୍ଡର ପୂର୍ବତନ ଉପମୁଖ୍ୟମନ୍ତ୍ରୀ ସୁଦେଶ ମାହତୋ ଯୋଗଦେଇଥିଲେ । ସେହିପରି ପଶ୍ଚିମବଙ୍ଗ ସରକାରଙ୍କ ମନ୍ତ୍ରୀ ରାଜେଶ ମାହତୋ, ରାଜ୍ୟସଭାର ପୂର୍ବତନ ସାଂସଦ ମମତା ମହାନ୍ତ, ଆଦିବାସୀ କୁଡ଼ମି ସମାଜର କେନ୍ଦ୍ରୀୟ ସଭାପତି ଶଶାଙ୍କ ଶେଖର ମାହତୋ, ସମାଜସେବୀ ଅମିତ ମାହତୋ, ଓଡ଼ିଶା କୁଡୁମୀ ସେନାର ସଭାପତି ଦିବ୍ୟାସିଂହ ମହାନ୍ତ, ଆସାମର ଦମନ କୁର୍ମୀ, କେନ୍ଦ୍ରୀୟ ଉପସଭାପତି ଡ. ମନୋଜ କୁମାର ମହାନ୍ତ, ଆସାମ କୁର୍ମୀ ସମାଜର ରାଜ୍ୟ ସମ୍ପାଦିକା ମନୁମତୀ କୁର୍ମୀ, ଡି. ଧର୍ମେଶ କୁର୍ମୀ, କେନ୍ଦୁଝରର ଖିରୋଦ ମହାନ୍ତ, ଶରତ ମହାନ୍ତ ଓ ମିତ୍ରଭାନୁ ମହାନ୍ତ, ଚାରି ଗୁରୁ ଦେହୁରୀ ସନ୍ତୋଷ କଟିଆର, ଝାଡ଼ଖଣ୍ଡର ଦୀପକ ପୁରିୟାର, ସୁନ୍ଦରଗଡ଼ର ଧ୍ରୁବଚରଣ ମହାନ୍ତ ଓ ପଶ୍ଚିମବଙ୍ଗର ମନରଞ୍ଜ ମହାନ୍ତ ପ୍ରମୁଖ ଯୋଗଦେଇଥିଲେ।
କାର୍ଯ୍ୟସୂଚୀ ଅନୁଯାୟୀ ସକାଳ ୧୦ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ସେମିନାର, ୨ଟା ୩୦ରୁ ୩ଟା ପର୍ଯ୍ୟନ୍ତ ଝୁମର ନୃତ୍ୟ ଏବଂ ୩ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଅତିଥି ସମାବେଶ ଅନୁଷ୍ଠିତ ହୋଇଥିଲା । ରାତିରେ ଝୁମର ମେଲୋଡି କାର୍ଯ୍ୟକ୍ରମ ଦର୍ଶକଙ୍କ ପାଇଁ ମୁଖ୍ୟ ଆକର୍ଷଣ ରହିଥିଲା । ଏହି ଜାତୀୟ ପରବ ମାଧ୍ୟମରେ କୁଡୁମୀ ସମାଜର ଭାଷା, ସଂସ୍କୃତି, ପରମ୍ପରା ଓ ସାମାଜିକ ଏକତାର ବାର୍ତ୍ତା ଦେଶର ବିଭିନ୍ନ ପ୍ରାନ୍ତରେ ପହଞ୍ଚାଇବାର ଉଦ୍ୟମ କରାଯାଇଛି । ଆସନ୍ତାକାଲି ମାନ୍ୟବର ମୁଖ୍ୟମନ୍ତ୍ରୀଙ୍କ ଆଗମନ ନେଇ ବିଭିନ୍ନ ଅଧିକାରୀ ସ୍ଥଳ ପରିଦର୍ଶନ କରିବା ଦେଖା ଦେଇଥିଲା ।






