ଉଦିତ ନାରାୟଣ ଠାକୁର /କଳାହାଣ୍ଡି ସାମ୍ବାଦିକ /ସମୀକ୍ଷା ନ୍ୟୁଜ:
ଜୁନାଗଡ଼, କଳାହାଣ୍ଡି: ଉଦିତ ନାରାୟଣ ଠାକୁର (ସମୀକ୍ଷା)ବାତ୍ୟାର ପ୍ରଭାବରେ ପ୍ରବଳ ପବନ ଓ ଝିପିଝିପି ବର୍ଷା ମଧ୍ୟରେ କଳାହାଣ୍ଡି ଜିଲ୍ଲାର ଜୁନାଗଡ଼ ସହରରେ ଘଟିଛି ଏକ ଅଘଟଣ। ସହରର ପୁରୁଣା ବସଷ୍ଟାଣ୍ଡ ନିକଟରେ ଜାତୀୟ ରାଜପଥ ୨୬ କଡ଼ରେ ନିର୍ମିତ ଗଜଲକ୍ଷ୍ମୀ ପୂଜା ତୋରଣ ହଠାତ୍ ଭାଙ୍ଗି ମୁଖ୍ୟ ରାସ୍ତା ଉପରେ ପଡ଼ିଯାଇଛି। ଫଳରେ ଏହା ତଳେ ଏକ ଅଟୋରିକ୍ସା, କାର୍ ଓ ବୋଲେରୋ ଚାପି ହୋଇଯାଇଥିବା ବେଳେ ଅଳ୍ପକେ ବର୍ତ୍ତିଯାଇଛନ୍ତି ଲୋକେ। ସୂଚନା ଅନୁଯାୟୀ, ମଙ୍ଗଳବାର ରାତିଠାରୁ କଳାହାଣ୍ଡି ଜିଲ୍ଲାରେ ପବନ ସାଙ୍ଗକୁ ଝିପିଝିପି ବର୍ଷା ଲାଗି ରହିଛି। ଏହି ସମୟରେ ଦିନ ପ୍ରାୟ ୧ଟା ବେଳେ ଜୁନାଗଡ଼ ସହରର ପୁରୁଣା ବସଷ୍ଟାଣ୍ଡ ନିକଟରେ ଥିବା ଗଜଲକ୍ଷ୍ମୀ ପୂଜା ତୋରଣ ହଠାତ୍ ଭୁଶୁଡ଼ି ପଡ଼ିଥିଲା। ତୋରଣଟି ରାସ୍ତା ଉପରେ ପଡ଼ିଯିବାରୁ ସେହି ସମୟରେ ଯାତାୟାତ କରୁଥିବା ତିନୋଟି ଗାଡ଼ି ଏହା ତଳେ ଚାପି ହୋଇଯାଇଥିଲା। ଏହି ଅଘଟଣ ଯୋଗୁଁ ଉକ୍ତ ରାସ୍ତାରେ ଯାନବାହନ ଚଳାଚଳ ସମ୍ପୂର୍ଣ୍ଣ ଠପ୍ ହୋଇଯାଇଥିଲା। ଖବର ପାଇ ଜୁନାଗଡ଼ ପୋଲିସ, ଅଗ୍ନିଶମ ବିଭାଗର କର୍ମଚାରୀ ଓ ଗଜଲକ୍ଷ୍ମୀ ପୂଜା କମିଟିର ସଦସ୍ୟମାନେ ଘଟଣାସ୍ଥଳରେ ପହଞ୍ଚିଥିଲେ। ଭଙ୍ଗା ତୋରଣ ତଳେ ଚାପି ହୋଇଥିବା ଗାଡ଼ିଗୁଡ଼ିକୁ ବାହାର କରିବା ସହ ରାସ୍ତା ସଫା କରିବା ପାଇଁ ଉଦ୍ୟମ କରାଯାଇଥିଲା। ଅପରାହ୍ଣ ୪ଟା ୩୦ ମିନିଟ୍ ସୁଦ୍ଧା ସମସ୍ତ ଗାଡ଼ିକୁ ସେଠାରୁ ବାହାର କରାଯାଇଥିଲା। ବାତ୍ୟାଜନିତ ପାଗ ମଧ୍ୟରେ ଏଭଳି ଅଘଟଣ ସହରବାସୀଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି। ବିଶେଷକରି ଜାତୀୟ ରାଜପଥ କଡ଼ରେ ନିର୍ମିତ ଅସ୍ଥାୟୀ ତୋରଣଗୁଡ଼ିକର ସୁରକ୍ଷା ଓ ଦୃଢ଼ତା ଉପରେ ଗୁରୁତ୍ୱ ଦେବା ଆବଶ୍ୟକ ବୋଲି ମତ ପ୍ରକାଶ ପାଇଛି। ତେବେ ଏହି ଘଟଣାରେ କେହି ଆହତ ହୋଇଛନ୍ତି କି ନାହିଁ ଏବଂ କେତେ ପରିମାଣରେ କ୍ଷୟକ୍ଷତି ହୋଇଛି, ସେ ସମ୍ପର୍କରେ ନିଶ୍ଚିତ ସୂଚନା ମିଳିନାହିଁ।






