ଉଦିତ ନାରାୟଣ ଠାକୁର /କଳାହାଣ୍ଡି ସାମ୍ବାଦିକ /ସମୀକ୍ଷା ନ୍ୟୁଜ:
ଆମପାଣି, କଳାହାଣ୍ଡି (ଉଦିତ ନାରାୟଣ ଠାକୁର ) ସମୀକ୍ଷା : ଆସ୍ଥା, ବିଶ୍ୱାସ ଓ ପରମ୍ପରାର ଅନନ୍ୟ ମହାମିଳନରେ ମୁଖରିତ ହୋଇଉଠିଛି କଳାହାଣ୍ଡି ଜିଲ୍ଲାର ଆମପାଣିସ୍ଥିତ ପ୍ରଭୁ ବୁଢ଼ାରଜାଙ୍କ ପୀଠ। ପ୍ରଭୁଙ୍କ ବାର୍ଷିକ ଦଶରା ପର୍ବକୁ ନେଇ ଅଞ୍ଚଳରେ ଭକ୍ତିମୟ ପରିବେଶ ସୃଷ୍ଟି ହୋଇଥିବାବେଳେ ଦର୍ଶନ ପାଇଁ ଶ୍ରଦ୍ଧାଳୁଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି। କଳାହାଣ୍ଡି ଓ ନବରଙ୍ଗପୁର ଜିଲ୍ଲାର ସୀମାନ୍ତରେ ଆମପାଣି ଘାଟି ତଳେ ଅବସ୍ଥିତ ପ୍ରଭୁ ବୁଢ଼ାରଜାଙ୍କ ପୀଠ ଧାର୍ମିକ ଦୃଷ୍ଟିକୋଣରୁ ଏକ ସ୍ୱତନ୍ତ୍ର ପରିଚୟ ବହନ କରେ। ଅଞ୍ଚଳର ଦେବଦେବୀଙ୍କ ମାମୁଁ ଭାବେ ପୂଜିତ ପ୍ରଭୁ ବୁଢ଼ାରଜାଙ୍କ ପ୍ରତି ଭକ୍ତମାନଙ୍କ ମନରେ ରହିଛି ଅଗାଧ ଶ୍ରଦ୍ଧା ଓ ଆସ୍ଥା। ପ୍ରତିବର୍ଷ ପ୍ରଭୁଙ୍କ ବାର୍ଷିକ ଦଶରା ଅବସରରେ ଏଠାରେ ଧାର୍ମିକ ଉତ୍ସାହ ପରିଲକ୍ଷିତ ହୋଇଥାଏ। ପରମ୍ପରା ଅନୁଯାୟୀ, ମା’ ମାଣିକେଶ୍ୱରୀଙ୍କ ଛତର ଯାତ୍ରା ପରେ କାର୍ତ୍ତିକ ମାସର ପ୍ରଥମ ଶନିବାରରେ ପ୍ରଭୁ ବୁଢ଼ାରଜାଙ୍କ ବାର୍ଷିକ ଦଶରା ପାଳନ କରାଯାଏ। ଏହି ପର୍ବ ଅଞ୍ଚଳର ପ୍ରାଚୀନ ଧାର୍ମିକ ପରମ୍ପରା ଓ ସମୃଦ୍ଧ ଲୋକସଂସ୍କୃତିର ପରିଚୟ ବହନ କରିବା ସହ ଅଞ୍ଚଳବାସୀଙ୍କ ମଧ୍ୟରେ ଆଧ୍ୟାତ୍ମିକ ଏକତାକୁ ସୁଦୃଢ଼ କରିଥାଏ। ଅନ୍ୟପକ୍ଷରେ, ପୀଠ ନିକଟରେ ଜାତୀୟ ରାଜପଥ-୨୬ ଅବସ୍ଥିତ ଥିବାରୁ ଦଶରା ସମୟରେ ଶ୍ରଦ୍ଧାଳୁଙ୍କ ଯାତାୟାତ ଓ ଯାନବାହନ ଚଳାଚଳକୁ ସୁବ୍ୟବସ୍ଥିତ କରିବା ଗୁରୁତ୍ୱପୂର୍ଣ୍ଣ ହୋଇପଡ଼ିଛି। ପର୍ବକୁ ଶାନ୍ତିଶୃଙ୍ଖଳାର ସହ ପାଳନ କରିବା ପାଇଁ ସୁରକ୍ଷା ଓ ଟ୍ରାଫିକ୍ ନିୟନ୍ତ୍ରଣ ଉପରେ ଗୁରୁତ୍ୱ ଦିଆଯାଇଛି। ପ୍ରଭୁ ବୁଢ଼ାରଜାଙ୍କ ଏହି ବାର୍ଷିକ ଦଶରା କେବଳ ଏକ ଧାର୍ମିକ ଉତ୍ସବ ନୁହେଁ, ବରଂ ଆମପାଣି ଅଞ୍ଚଳର ଐତିହ୍ୟ, ପରମ୍ପରା ଓ ସାଂସ୍କୃତିକ ଏକତାର ପ୍ରତୀକ। ପ୍ରଭୁଙ୍କ ପ୍ରତି ଅତୁଟ ଆସ୍ଥା ଓ ବିଶ୍ୱାସ ଆଜି ବି ଏହି ପରମ୍ପରାକୁ ଜୀବନ୍ତ ରଖିଛି।






