ଅବିନାଶ ଗଡତିଆ/ବରଗଡ଼ /ସମୀକ୍ଷା ନ୍ୟୁଜ:
ଓଡ଼ିଶାର ଖାଦ୍ୟ ସଂସ୍କୃତିରେ ମୁଢ଼ିର ଏକ ସ୍ୱତନ୍ତ୍ର ସ୍ଥାନ ରହିଛି। ସେ ମୟୂରଭଞ୍ଜର ମୁଢ଼ି-ମାଂସ ହେଉ କିମ୍ବା ପଶ୍ଚିମ ଓଡ଼ିଶାର ଚଟପଟା ମସଲା ମୁଢ଼ି, ଏହି ଦେଶୀ ସ୍ନାକ୍ସ ସମସ୍ତଙ୍କର ଅତି ପ୍ରିୟ। ପଶ୍ଚିମ ଓଡ଼ିଶାର ସମ୍ବଲପୁର-ଝାରସୁଗୁଡ଼ା ଆଞ୍ଚଳିକ ପରିସୀମା ମଧ୍ୟରେ ଥିବା ଖିଣ୍ଡା ଛକ ଏବେ ଏମିତି ଏକ ସ୍ୱାଦିଷ୍ଟ କାରଣ ପାଇଁ ଲୋକଲୋଚନକୁ ଆସିଛି, ଯାହା ହେଉଛି ଏଠାକାର ପ୍ରସିଦ୍ଧ “ରାମଲାଲା ମୁଢ଼ି ଷ୍ଟଲ୍”। ରାସ୍ତା କଡ଼ର ଏହି ଛୋଟ ଦୋକାନଟି ଏବେ କେବଳ ସ୍ଥାନୀୟ ଲୋକଙ୍କ ପାଇଁ ନୁହେଁ, ବରଂ ଏହି ବାଟ ଦେଇ ଯାଉଥିବା ଯାତ୍ରୀ ଏବଂ ଖାଦ୍ୟପ୍ରେମୀଙ୍କ ପାଇଁ ଏକ ପ୍ରମୁଖ ଆକର୍ଷଣ ସାଜିଛି। ରାମଲାଲା ମୁଢ଼ି ଷ୍ଟଲ୍ର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାର ପ୍ରସ୍ତୁତି ଶୈଳୀ ଏବଂ ମସଲାର ସନ୍ତୁଳନ। ଏଠାରେ ମୁଢ଼ିକୁ କେବଳ ତେଲ ଏବଂ ଚାନାଚୁର ସହ ଗୋଳାଯାଏ ନାହିଁ, ବରଂ ଏଥିରେ ବ୍ୟବହାର କରାଯାଉଥିବା

ସ୍ୱତନ୍ତ୍ର ଘରୋଇ ମସଲା, ସିଝା ବୁଟ, କଟା ପିଆଜ, କଞ୍ଚା ଲଙ୍କା, ଧନିଆ ପତ୍ର ଏବଂ ସିକ୍ରେଟ୍ ଚଟଣି ଏହାକୁ ଏକ ଅନନ୍ୟ ସ୍ୱାଦ ଦେଇଥାଏ। ଗ୍ରାହକଙ୍କ ପସନ୍ଦ ଅନୁଯାୟୀ ଏଠାରେ କମ୍ କିମ୍ବା ଅଧିକ ରାଗ କରାଯାଇ ତାଜା ଏବଂ କ୍ରଞ୍ଚି ମସଲା ମୁଢ଼ି ପରଷାଯାଏ । ଖିଣ୍ଡା ଛକର ଏହି ଷ୍ଟଲ୍ରେ ସଞ୍ଜ ନଇଁଲେ ଲୋକଙ୍କ ଭିଡ଼ ଜମିବାକୁ ଲାଗେ। ମାତ୍ର ଅଳ୍ପ ଟଙ୍କାରେ ମିଳୁଥିବା ଏହି ସ୍ୱାଦିଷ୍ଟ ଏବଂ ପେଟପୂରା ଜଳଖିଆ ଖାଇବାକୁ ସ୍କୁଲ-କଲେଜ ପିଲାଙ୍କ ଠାରୁ ଆରମ୍ଭ କରି ଅଫିସ୍ ଫେରନ୍ତା ବାବୁ ଏବଂ ବରିଷ୍ଠ ନାଗରିକଙ୍କ ପର୍ଯ୍ୟନ୍ତ ସମସ୍ତେ ଧାଡ଼ି ବାନ୍ଧନ୍ତି। ଦୋକାନୀଙ୍କ ମଧୁର ବ୍ୟବହାର ଏବଂ ସ୍ୱଚ୍ଛତା ଉପରେ ଦିଆଯାଉଥିବା ଧ୍ୟାନ ଗ୍ରାହକମାନଙ୍କୁ ବାରମ୍ବାର ଏଠାକୁ ଟାଣି ଆଣିଥାଏ।ଆଜିକାଲି ସୋସିଆଲ ମିଡିଆ ଯୁଗରେ ସ୍ଥାନୀୟ ଫୁଡ୍ ବ୍ଲଗରମାନଙ୍କ ନଜର ଏହି ଷ୍ଟଲ୍ ଉପରେ ପଡ଼ିବା ପରେ ଏହାର ଲୋକପ୍ରିୟତା ଆହୁରି ବଢ଼ିଯାଇଛି। ଖିଣ୍ଡା ଛକ ଦେଇ ଯାତ୍ରା କରୁଥିବା ଲୋକମାନେ ରାମଲାଲା ମୁଢ଼ି ଷ୍ଟଲ୍ ପାଖରେ ଗାଡ଼ି ଅଟକାଇ ଏହାର ସ୍ୱାଦ ନେବାକୁ ଜମାରୁ ଭୁଲନ୍ତି ନାହିଁ।





