ସୁଶାନ୍ତ ପଣ୍ଡା / ଜିଲ୍ଲା ପ୍ରତିନିଧି / ବରଗଡ଼ / ସମୀକ୍ଷା ନ୍ୟୁଜ:
ବରଗଡ଼: ବରଗଡ଼ ଜିଲ୍ଲା ଗାଇସିଲେଟ ଥାନା ପକ୍ଷରୁ ଆଜି ରାଷ୍ଟ୍ରୀୟ ଏକତା ଦିବସ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି। ଏହି ଅବସରରେ ଥାନାଧିକାରୀ ସୁଶୀଲ କୁମାର ନାୟକଙ୍କ ନେତୃତ୍ୱରେ ବିଭିନ୍ନ ସଚେତନତାମୂଳକ ଓ ଜନକଲ୍ୟାଣକାରୀ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଦିବସର ପ୍ରାରମ୍ଭରେ ଏକ ଗଣଦୌଡ଼ ଆୟୋଜନ କରାଯାଇଥିଲା। ଏହାପରେ ଗାଇସିଲେଟ ଉଚ୍ଚବିଦ୍ୟାଳୟର ଛାତ୍ରଛାତ୍ରୀଙ୍କୁ ନେଇ ଏକ ଚିତ୍ରାଙ୍କନ ପ୍ରତିଯୋଗିତା ହୋଇଥିଲା। ଏଥିରେ କୃତିତ୍ୱ ହାସଲ କରିଥିବା ଛାତ୍ରଛାତ୍ରୀଙ୍କୁ ପୋଲିସ ବିଭାଗ ପକ୍ଷରୁ ମାନପତ୍ର ପ୍ରଦାନ କରି ଉତ୍ସାହିତ କରାଯାଇଥିଲା। ସେହିପରି ଅପରାହ୍ନ ୪ଟା ସମୟରେ ତାଲପାଲି ଗ୍ରାମପଞ୍ଚାୟତ କାର୍ଯ୍ୟାଳୟଠାରେ ଥାନାଧିକାରୀ ଶ୍ରୀ ନାୟକଙ୍କ ସଭାପତିତ୍ୱରେ ‘ଆମ ପୋଲିସ ସମିତି’ ଓ ‘ନିଶାମୁକ୍ତ ଭାରତ’ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ନାଗରିକ ଓ ପୋଲିସ ମଧ୍ୟରେ ସୁସମ୍ପର୍କ ସ୍ଥାପନ ସହ ନିଶାମୁକ୍ତ ସମାଜ ଗଠନର ଆବଶ୍ୟକତା ଉପରେ ଗୁରୁତ୍ୱ ଦିଆଯାଇଥିଲା। ଏହି କାର୍ଯ୍ୟକ୍ରମରେ ତାଲପାଲି ସରପଞ୍ଚ ସଞ୍ଜୀବ କୁମାର ସାହୁ, ସବ୍-ଇନ୍ସପେକ୍ଟର ପ୍ରଦୀପ କୁମାର ତ୍ରିପାଠୀ, ନିୟମାନନ୍ଦ ପ୍ରଧାନ ଏବଂ ସମାଜସେବୀ ସୁଶାନ୍ତ ପଣ୍ଡା ପ୍ରମୁଖ ଯୋଗଦେଇଥିଲେ। ଏଥିସହ ଏ.ଏସ୍.ଆଇ. ରିତାଞ୍ଜଳି ଖମାରୀ, ଗିରିଶ କୁମାର ପଧାନଙ୍କ ସମେତ ଗାଇସିଲେଟ ଥାନାର ଅନ୍ୟାନ୍ୟ କର୍ମଚାରୀ ଉପସ୍ଥିତ ରହି କାର୍ଯ୍ୟକ୍ରମରେ ସହଯୋଗ କରିଥିବା ବେଳେ ଅଞ୍ଚଳର ଅନେକ ସଚେତନ ନାଗରିକ ଉପସ୍ଥିତ ଥିଲେ । ରାଷ୍ଟ୍ରୀୟ ଏକତାର ଭାବନାକୁ ସୁଦୃଢ଼ କରିବା ସହ ସମାଜରେ ଶାନ୍ତି, ସଦ୍ଭାବନା ଓ ନିଶାମୁକ୍ତ ପରିବେଶ ଗଠନ ଦିଗରେ ଏହି କାର୍ଯ୍ୟକ୍ରମ ଏକ ସକାରାତ୍ମକ ବାର୍ତ୍ତା ପ୍ରଦାନ କରିଛି।






